振英片醫管局肥胡、又插白頭佬任志剛，傳媒自然對號入座，認為乃政治報復兩人挺唐。而唐唐插巿建局起樓華而不實、貴到無倫，自然又被視為衝住振英頭馬，向巿建局請假幫振英競選的主席張震遠而來。更可笑兩陣對壘先鋒單挑之際，從振英右側翼見一女將英姿颯爽，手執雙槍斜斜殺出，衝向唐營，定晴一看，原來乃好打得林鄭月娥，雙槍齊出，先批唐唐丁屋加高建議，又撐巿建局起貴樓乃符合政府政策。左翼則有房協出手怒摑曾蔭權、鄭汝樺，以新樓盤出售新規定，附和振英港人買港樓之民粹建議，直接否定早前局長話難禁以公司名義買樓立場。一場建制「競爭」，變成大混戰，已令特區施政呈亂象，中央主事官員責無旁貸。
林鄭突抽水 建制大混戰
本來曾班子對兩人互片採中立態度，合情合理，以示選舉公允。振英先搶韁批曾班子在土地、房屋、人口、退休保障失誤，現屆官員均緊守三不政策，即不反擊、不抽水、不表態。殊不知林鄭率先打破三不政策，向唐唐出招。究竟係林鄭過份激憤，義憤填膺不得不出手捍衞本屆政府政策？定係借力打力，幫振英出手插唐唐一刀？政客不是省油燈，張震遠乃林鄭一手扶持上位，委以重任，本應避嫌，林鄭更需有高度自覺，不應參與大混戰，向唐唐抽水。
假如另一女將鄭汝樺也不識大體，有樣學樣跟從林鄭，又提起金瓜槌上馬衝入振英陣中，捍衞政府房屋政策，反駁CY建屋指標荒謬，港人買港樓白癡，殺聲震天，再回馬誅殺房屋協會內裏通振英之大將，你話幾好睇。建制互片乃一場利益重組，與泛民互搏則屬口水戰，兩者性質不可同日而語。蠱惑仔口水戰唔會死人，同傑哥、鐵頭仁鬥噏鬧完就握手落台，但爭奪睇場、泊車、賣丸仔、賣老番的利益誰屬時，又唔同玩法。即係話振英贏，肥胡、攞命陳等紫荊一族將冇運行；唐唐贏，林鄭、張震遠、鄔滿海一樣冇運行，咁樣雙方都會動真火，要有人倒下方休。
戰火遍機構 阿爺估唔到
醫管局、金管局、巿建局、房協，個個手握數十至千億資源，甚至關乎香港命脈，戰火燒到法定機構及現任官員參戰，相信阿爺始料不及。唔知會唔會有人玩到去插「聯繫滙率」，鬼子佬就等咗呢日好耐！
早就講過冇政黨執政，冇政黨倫理、冇民主政治文化，由一班業餘人玩特首選舉，任由傳媒舞弄，擴大矛盾，令管治核心瓦解，危矣！所謂建制競爭冇規冇矩，究竟係好定壞，有目共睹！你話點收科？
添馬男