新一年，唔少國際性投資銀行陸續派「大信封」，裁員新聞不絕。雖然各國金融才子當災，但香港嘅芬佬絕對係逆市奇葩，可以坐定粒六等人高薪挖角，有芬佬好跨張咁話：「日日都接到電話問轉唔轉工！」
本港基金經理咁好景，梗係要多謝阿爺啦。去年底阿爺批咗成21間中資金融機構喺香港發行RQFII（人民幣合格境外機構投資者）基金，呢啲有認可資格嘅中資基金證券公司，大多數喺香港成立只有一至三年。根據本港證監會要求，要發行公開認購基金，至少有兩個五年以上經驗嘅基金經理先得，咁就為業界帶嚟42個就業職位，本港嘅芬佬迅即成為搶手貨。
但首批RQFII基金就遇到樽頸位，因為要分銷銀行一下子識咁多代理產品，需要時間培訓。