滬綜指上周五跌1.3%，累港股開市升少咗，但收市仍升109點，表現偏強，相信短炒蜜月期仲未完。近排個市先炒汽車股，跟住光伏股，上周五炒內房，真係日日有嘢炒。汽車股中，要買基本因素理想嘅，可諗諗長城汽車（2333），長短皆宜。
長汽主要銷售自家品牌嘅運動型多用途車（SUV）、轎車、皮卡車同汽車零件，近年銷量節節上升，舊年1至11月，銷量按年升28.7%至43.4萬輛，比吉利（175）仲要多，相信全年增幅會遠超中國乘用車市場嘅2.8%。
長汽銷售超過八成屬內銷，首11月騰翼轎車銷量18.13萬輛，按年增長60.9%，完全唔覺俾車市不景拖慢，反映產品經得起低潮。晉佳估計，長汽今年盈利應該Keep住跑贏同業。
雖然唔少內地人認為外國月亮特別圓，令有錢人都走去買華晨寶馬，但總有大把唔多富有嘅人，怕吉利啲車威唔起，寧願買架裝到一家大細甚至裝到貨又平靚正嘅車，點會計較係咪來路貨。長汽嘅車幾萬蚊有交易，又夠實用，啱晒呢個Market，內地就有唔少網友撐佢。
長汽啱啱公佈舊年業績快報，淨利潤升28.5%至34.71億元（人民幣．下同），其中第四季9.2億元，較第三季7.39億元回升，回復首兩季水平，亦高過券商預測，睇嚟可以支持短線股價表現。期內每股盈利1.23元，市盈率約8.4倍。長汽新款轎車騰翼C50啱啱推出，可以谷吓銷量，相信亮麗表現可以延續。
升破阻力挑戰15元
長汽2011年預測市盈率8.4倍，同吉利差唔多，但滲透率仲有上升空間，可以繼續跑贏內地車市，吉利已飽和，只會同車市一齊浮沉。至於高檔轎車霸主華晨（1114），預測市盈率19.7倍，雖然盈利增長可測性高，但計估值點都係長汽吸引。
睇周線圖，10月反覆守住頭肩頂頸線（現延至9.80港元．下同），然後回升，上周突破12元阻力線，暫時中短線有睇頭，可挑戰高位15元。不過，長汽中線仲未完全擺脫頭肩頂形態，如果中線跟大市向下，保歷加通道中軸11.60元係短線止蝕位，中線跌穿上升支持線10.80元即走。
晉佳
本欄逢周一、三及五刊出