一連兩場「謝安琪你們的幸福演唱會」前晚於紅館舉行，近日有傳謝安琪（Kay）的經理人夏森美與環球唱片鬧翻，她前晚談到近年的是非時忍不住落淚，於個唱尾聲答謝經理人、助手及監製，唯獨沒有多謝環球老闆。
謝安琪前晚於紅館開騷，邀請了RubberBand及24味擔任嘉賓。Kay的丈夫張繼聰完成工作後，晚上10時才到場支持。Kay在個唱上大打溫情牌，播出一家三口的幸福合照，又有她教囝囝唱歌的片段。
教仔開心擁抱人生
Kay唱出《第二天》送給兒子，她說：「人生總有起跌，有好多事都冇辦法自己去編排，但係有權選擇開心同唔開心。我入行之後好多機會畀我去鍛鍊，我都知睇一套戲如果得雲、牛同草會好悶，要有起承轉合先至好睇，所以我都好早同個仔講要選擇用正能量面對，要用開心、包容去擁抱人生。」
盛傳Kay及經理人夏森美跟環球旗下的新藝寶唱片公司關係陷於僵局，更有指夏以300萬為Kay提前向環球解約。環球高層和歌手前晚均沒有到場，未知Kay是否因最近的傳聞困擾有感而發，她安歌時說：「成為一個歌手本來唔係我嘅夢想，我本來想做教師將好嘅嘢傳畀下一代，希望世界更美好，我做歌手係偶然下遇到我嘅監製。」她表示出第一隻碟時，沒有唱片公司願意發行，幸好有一班好好的團隊無懼風浪，她說：「我哋團隊有好幾位打不死嘅人，就係周博賢同夏森美，最近夏森美受好多抨擊，但佢仲好肥，應該冇事。」及後Kay答謝助手時，歌迷報以掌聲，她笑言：「夏森美你檢討吓啦，助手掌聲多過你。其實我哋好似一個小家庭、一個細嘅山寨廠，只係想做好音樂。」
「風大浪大都堅持」
此時Kay忍不住哭起來，她說：「我哋遇到好多事，雖然風大浪大都堅持，其實只有一個簡單嘅心願，就係做好音樂。我諗咗個gag，就係落雨就當洗面，大浪就當冲凉，大風就當吹番乾，我哋用打不死嘅精神做音樂。」不過Kay整晚沒有答謝環球老闆、高層黃劍濤以及一班工作人員。
採訪：胡比
攝影：黃文偉
