玩《SoulCaliburV》（劍魂5）呢隻刀劍格鬥Game出名爽快，今集仲添加劍聖同英雄王等新人物，最正係自創角色，由五官到「胸肌」都可自行變更，將Cup數谷到最大，未正式開波埋牙，已經噴到一地鮮血！
文：阿洛
兩代角色混戰
《劍魂》系列累計銷售超過1,000萬套，新一集《劍魂5》，以前作17年後嘅時空為背景，以靈劍SoulCalibur同邪劍SoulEdge正邪對決為故事重心。新世代新人物，主角年輕劍士Patroklos首次成登場人物，還有女忍者等新角色，當然亦唔少得其他關鍵舊角色如騎士Siegfried、夢魘Nightmare等都會相繼回歸。不過比較令人失望係初回特典中，只係追加喺PSP外傳中登場過嘅騎呢阿叔Dampierre，以及供自創角色使用嘅黑、白騎士配件下載序號，同上一代有《星戰》黑武士、尤達大師亂入，吸引力爭太遠了！
《鐵拳》元素亂入
今次玩法活用網絡對戰機能，除咗故事模式外，仲有供玩家挑戰最高等級劍魂殿堂模式LegendarySouls，仲可以透過線上排行榜同全球玩家鬥過；另外角色創造模式將會收錄同廠《鐵拳》系列嘅「惡魔仁流派」，令玩家可施展三島流招式同埋超常惡魔招式，明顯係吸納《鐵拳》Fans參戰嘅新元素，亦係其耐玩之處。如果老友唔多，仲可試QuickBattle，由電腦模擬真人做你Online對手，包括上年7月舉辦嘅募集活動中入選嘅角色，而《鐵拳》製作人原田勝弘，更以惡魔仁流派「HaradaTEKKEN」身份登場，但記得只係電腦模擬操作，你用藍芽同佢傾偈都唔識應你㗎！
講到招式，今次仲有初代之後首次回歸嘅CriticalEdge，呢招可以逆轉局勢、一招翻本嘅致命絕招，定必令對戰刺激性大增，而且發動之後消耗CriticalGauge能源計時，可以施展埋一連串強力攻擊，夠晒華麗兼肉緊！
《劍魂5》
主機：PS3/XB360
廠商：NAMCOBANDAIGames
類型：格鬥
人數：1-2人
發售：2月2日
