校友會每年一月嘅午餐例會例牌講新一年投資展望。2012年係令人困惑的一年，大部份專家在去年末都表示悲觀，甚至乎認為2012年係「投資末日年」，但啲專家意見個個星期不同，今個星期股市連環爆升，本來以為A股要力守21000點，點知就憑溫總一句話，A股竟然大反彈，上試2200點，帶動港股站穩一萬九千點以上，於是個mood唔同晒，大行又試唱好，問你點辦。
校友M趕住去電視台做答問節目，第一個講先，佢話兔年股市正是靜如處子，動如脫兔，卒之全年成交額靜過鬼，而波幅上落夠晒大。龍年又點睇呢？佢話西方基金過往重視「中國增長故事」，對中國H股願意付出P/E溢價（即係肯買入高市盈率H股），但佢認為「中國增長故事」已有褪色之感，P/E溢價正在縮減，洋基金隨時會掉轉槍頭：「今日長纓在手，何時縛住蒼龍」砌番H股都似。校友M話今年要小心從事，避開中國高增長股，水泥股，黃金珠寶股及濠賭股，以收息為第一要務，首選推薦電訊信託（6823），其次係中移動（941），然後係電能實業（前港燈），及一啲地產信託基金（REIT）如冠君2728及728。
校友P係基金界知名人物，佢派一張2012年宜忌單張畀大家睇，忌內房股，水泥股，資源股（首季）及中資金融股（首季），宜買入出口股，高息工業股，A50，內需股，本地房地產股等等，加加埋埋一大張紙，難以盡錄。校友L就係發達商人，在內地有大生意，佢講實體經濟，指出經2008一役，汰弱留強，今天仍然在珠三角經營嘅廠商，實力有番咁上下，歐洲唔見得會衰退，美國定單仍然來得平穩。香港方面，佢只見到工人難請，人工急升嘅現象，建造業尤其難搵勞工，出到一千七百元一日（日薪）都搵唔到紮鐵工人，令到建造成本急升，興建大學生宿舍都要三千元以上（每呎建造成本計），計埋地價更加唔掂，所以校友L話：「暫時見唔到不景氣跡象噃！」佢建議如果唔等錢使嘅話，以6-7年為一投資周期，買入中國銀行（3988），工商銀行（1398）呢啲低P/E高息股，無理由輸嘅唧！