雲想衣裳：海南島直擊　高海浪之戀

雲想衣裳：海南島直擊　高海浪之戀

滑浪這門活動，近年越見多入門者，大抵是因為刺激又解暑，總覺得拿着一塊滑浪板落水上岸的一刻是最Man的。可惜季節所限，一到入冬即無緣。近近哋，想玩吓又睇睇真正高手與海浪鬥智鬥力，必定要到海南島。海南島除被當地政府大力打造成東方夏威夷外，今年開始更成為國際滑浪協會（ISA）的比實場地之一，避寒度假兩者兼備。

記者：雷福財
攝影：伍慶泉

首次的中國站

海南島的四季溫差不算太大，即使在這個月份還徘徊在18℃、19℃，對不少北方或俄羅斯人絕對是避寒勝地，加上地理位置擁有1,823公里海岸線，提供天然破浪點及靚灘，近年已受到當地政府重視，決心打造成天然遊客度假區。而國際滑浪協會便睇中這點，首次與海南島政府聯手舉辦國際滑浪節，選址落於三亞市以東的萬寧市日月灣，並於早前1月6日至14日期間舉行了ISA中國盃及4星級賽事──海南精英賽（HainanClassic）比賽，讓滑浪愛好者一次過睇晒全球頂尖分子的技術。

■大會現場工作人員，位位青春十足。

8國聯軍　澳洲摘冠

雖則中國仍未有機會入圍，但能夠欣賞早前於巴拿馬舉行的世界滑浪賽成績最佳的8個國家（包括：澳洲、巴西、法國、阿根廷、南非、秘魯、委內瑞拉及美國）選手，睇頭十足，即使未玩過，都一定被其魔力感染。每隊以四男兩女組成，爭奪隊制及個人冠軍，以及為國家爭取最高殊榮。而今站男子組冠軍則由澳洲隊奪得。而緊接的1月11日至14日海南精英賽，冠軍獎金更達95,000美金。而完成今次中國比賽後，下一站將於秘魯利馬上演。

■冠軍得主來自澳洲，亞軍及季軍分別為美國及法國。

■五湖四海的浪人。

■來自上海的中國職業選手Jack，表明今次嚟學嘢。

■比賽時為防跣，參賽者出賽前必以橡膠擦板，增強接觸面，與滑板的磨砂貼原理相類似。

■巴西選手WigGollyDantas。

■巴西女選手BrunaSchmitz。

■秘魯選手之一Gabriel。

Quiksilver免費教滑浪

今番赴海南島，除欣賞一連串賽事外，板類頂級品牌Quiksilver亦於賽事期間聯手坐鎮，為入門者提供免費專人滑浪課程，場地更提供滑浪電子遊戲、大派爆穀、有獎遊戲等，實行出錢出力推廣呢項運動。除此以外，緊接每日比賽完結後，現場便化身成沙灘音樂會，今年便邀請到台灣創作歌手范逸臣、酷愛樂團、中國的唐朝樂隊、牛奶咖啡等樂隊現場助興，帶高氣氛，若然想寓度假於娛樂，下一年謹記留意。

■Quiksilver提供1.5小時免費課程，由鬼仔教練教授，夠晒誠意。

■入鄉隨俗玩小販單車，但只作陳列之用，絕非四周踩住賣。

■興之所至，一樣有各式最新泳衣、沙灘用品任你揀。

■現場所見呢類有獎遊戲，就最受強國遊客愛戴。

■沙灘音樂會，食正近排大熱的RocknRoll潮。