湯漢09年4月接任天主教香港教區主教近兩年，陳日君一直拒絕評論湯漢嘅作風。外界總覺得湯漢無陳日君咁敢言直率，作風似乎較為保守。陳日君噚日話，每人處事方式唔同，最終都係為咗教會好，個心都係希望幫助內地嘅教友。兩人噚日就老友鬼鬼，一齊喺堅道教區切蛋糕慶生。
自稱係冇權樞機
不過，陳日君話畀八方知，一個地方有兩個樞機係好少見，但佢係「冇權樞機」。原來，教會近年有規定，年滿80歲嘅樞機冇權投票選出新教宗，因此委任湯漢為樞機順理成章。
陳日君又話雖然已退休，但如果有需要，仍會為內地教友出聲，唔會「封口」。陳日君點睇特首選舉，佢話已經好少留意呢啲新聞，連家吓有幾多人有機會入閘選特首都唔係好清楚。不過佢大嘆，香港教育水平咁高，竟然仲未可以普選特首，真係好可惜。