靚太們對七人車真係又愛又恨，愛它負載量高，載老爺奶奶老公同個仔一齊去街都一樣咁舒服；恨的是女人的天敵──泊車！又大又長的車身真係唔係個個都識泊，顧得車尾就顧唔到個車頭，如果有天眼通你話幾好呢？全新運到的2012年版日產Elgrand，車身前後左右裝有AVM環視顯像系統，啟動天眼通泊車無難度。
記者：蕭漢祥
攝影：黃子偉
Model：[email protected]
360度睇通睇透
相信以上的說話，不單止女士們有同感，就連有車牌的男士們都會有，因為大部份的男士都應該曾經被泊唔到車的女士求救，幫手泊位。雖然現今大部份汽車，車尾甚至車頭都裝有泊車感應系統，憑聽覺就知道尚有多少距離，但只是聽到始終安全感不夠，如果整個車身四條邊都一次過睇晒你話幾好呢。這類「泊車天眼通」的設備其實早年已經出現，但香港裝有的往往都是水貨車，或是原廠車運抵香港後，進行後期加裝，原裝行貨少之有少。最近日產運抵香港、級數最高的ElgrandHighwayStarDynamic，已經打通任督二脈，天眼通了。
這套AVM環視顯像系統（AroundViewMonitor），全車四隻鏡頭除了車尾那個較為顯眼之外，其餘三個隨時唔講你真係會唔覺，分別裝於兩邊倒後鏡底，以及鬼面罩品牌徽章底下，360度全景盡攝。所拍得的畫面傳送到中控台的7吋顯示屏，經過系統組合之後，可分別以鳥瞰圖及車尾、車側及車尾、車尾全屏幕三個角度顯示車身狀況。其中鳥瞰角度是電腦從鏡頭拍得車旁的影像重新整合，並將實景及動畫混合顯示，製作出由車頂角度觀看的畫面，所以無論是行車分隔線、車位，甚至水渠蓋都睇得一清二楚。系統再配合距離警示器，遇到物件靠近時發出咇咇聲響，畫面亦會在相關的方向閃亮綠、黃、紅三級警示燈，簡單到淨係睇住個mon都可以泊到車。
追加11吋LCD屏幕
HighwayStarDynamic稱得上是Elgrand中設備最齊全的款式，今次新車內在配置同樣升級，於中排座椅車頂加裝了11吋電動開合式LCD屏幕，在中控台一按，屏幕徐徐放下，播戲聽歌一樣啱。而USB音響傳輸又點少得，加上可儲存約2,000首歌的MusicBox，配備紅外線耳筒，最啱大家穿梭中港之際relax吓。公關哥哥表示，今次Elgrand的改變，是為客人提供方便。以往輸港的汽車配備較為齋一點，但眼見好多客人取車之後，要自行四出尋找配件，加裝鏡頭與音響，還有替車身扮靚加大包圍。所以今次省卻大家的麻煩，除增加車廂的舒適度，外觀亦有小改變，車頭擾流器及車尾都加裝了頂翼，配合18吋鋁合金225/55輪胎，外表好醒神。再者，日本原廠已裝嵌完成，避免了自家製作而可能出現的安裝位置不佳、容易鬆脫等情況，真係用心良苦！
ElgrandHighwayStarDynamic
引擎：3,498ccV6雙頂凸輪軸引擎
馬力：280PS/6,400rpm
扭力：35.1kg-m/4,400rpm
傳動：6前速Xtronic無段變速連+/-
售價：$688,800
查詢：28035333（合誠汽車）
