踏入2012年不足兩周，天主教香港教區前主教陳日君樞機踏入佢嘅80歲大壽。噚日佢所屬嘅慈幼會喺土瓜灣一間酒樓擺咗約廿圍同陳樞機賀壽，場面熱鬧。生日流流，陳樞機毫無忌諱大談自己可能好快「埋單」，但係即使要佢回歸天主懷抱，陳日君話佢嘅喪禮都係一場笑喪，「唔係掛白燈籠，應該係掛紅燈籠！」
西曆陽曆自訂慶生周
陳日君噚日分別到何文田鄧鏡波中學主持聖禮降福儀式，老中青嘅教友都有出席。之後夜晚佢就去慈幼會幫佢搞嘅80歲嘅壽宴，好多人爭住同陳樞機影相。陳日君喺酒樓致辭時話，退休之後會繼續教書，拍心口話自己中氣十足。佢話日後會繼續去囚犯探望犯人，為佢哋祈禱，但就唔會再返內地教書，亦唔會有咩新猷。
生於1932年嘅陳日君話，今年好多人都好想同佢慶祝生日。但係由於時間唔夠，所以佢諗咗個方法……就係將西曆同陽曆兩個生日之間嘅檔期，列為「慶生周」，日日檔期排到密一密，兩個星期以來不斷同好友食飯慶祝。
生於黃金時代好幸福
佢話，天主向來好寵愛佢，因為正當人人以為佢生於一個戰亂時代，但係佢認為自己係生於一個相當幸福嘅黃金時代。「三十年代、四十年代，嗰陣時打仗，教會係呢個時代係好活耀，我學到好多宗教禮儀，無論讀書或教書，都係好開心。」
人生七十古來稀，如今已80歲嘅陳日君話要多謝佢嘅父母，今後會生生性性，今後本着當初信奉天主教熱誠，繼續為教會服務。
mailto:[email protected]