煲呔噚日喺新政總大清洗後，兌現早排白鴿黨李永達要求，請班議員食午飯，飯前有特別節目，就係參觀據稱退伍軍人菌含菌量最低嘅蘇錦樑局長辦公室同廁所。
煲呔飯前不忘搞爛gag，話把聲有啲沙沙地，「但唔使驚，我仲有五個半月先退伍，同聲沙無關」。煲呔解釋，前排去北京述職凍親，細佬妹返港過年時又食滯咗，後來出訪上海再凍多鑊，結果就失聲。
餐前被寸係毒男
煲呔期後再搞gag，指搬入新政總有唔少風風雨雨，包括朝早睇到報章標題寫住「全面清洗政府總部」，「我話唔係吓嘩？北大人咁快？我哋仲有五個月任期喎，全部掃哂？」後來睇清楚係清洗水管同儲水庫先至無咁驚，仲強調新政總最新水質檢驗全部合格，議員可放心食飯。
李永達飯後話，飯局上同煲呔講，離任特首前，可以喺6月尾請成班議員到禮賓府食多餐，話自己願意坐定定，畀煲呔鬧返半粒鐘。阿達又話，飯前寸煲呔個廁所最多菌，名符其實係毒男，但煲呔唔明毒男點解，身邊的曾太就幫口話唔使驚，叫煲呔以毒攻毒就搞掂。