蘋機會：美國CES直擊（四之一）　三星視帝　舉手上網

蘋機會：美國CES直擊（四之一）　三星視帝　舉手上網

每年一月，又係世界性重頭展覽CES（電子消費展）舉行大日子。上年走勢極凌厲嘅三星，今年將創意點子擺晒落重頭戲電視科技上。除畫質靚爆嘅SuperOLEDTV，更有「加眼」電視同你玩互動，轉台校音量甚至上網，講句嘢郁吓手就得，雙手變Remote，簡直係家中視帝咁巴閉。

記者、攝影：韓繼聰

握拳頭當Click

甫走進會場，已被三星大面積場館所吸引，除地方大新機多外，現場亦被傳媒擠得水洩不通，好不熱鬧。放在會場入口當眼處嘅全新SuperOLEDTV，固之言吸引各方眼球，但筆者更感興趣的，是設有如同Kinect眼仔的ES8000LEDTV。眼仔Size極細，隱藏於機頂，主力感應用家動作和聲音。三星員工即席示範，先蹺埋雙手氣定神閒同部電視講「HiTV」，原來呢個MagicWord就代表啟動聲控功能，再講volume、channel、up、down等字眼，即可調校音量同頻道，控制相當流暢，辨聲系統快捷準確，幾乎做到一噏就有反應，勁！
當然智能電視強調嘅上網功能，現場亦有示範，當你瀏覽緊網頁時，可舉起手扮滑鼠，碌嚟碌去在網絡世界飛馳，而且揀啱心水Item，只需握實拳頭即可做出Click嘅動作，操作上極有XB360Kinect影子。

■多人爭相試玩三星平板電腦同智能手機。

唔係同你Hi呀，只係扮緊滑鼠操作電視咋！

■新電視最大賣點就係頭頂眼仔，能感應你雙手動作。

■官方無公布機身厚度，但現場睇真係好薄。

■實地試玩多項操作，由聲控到動作偵測，都同樣快夾準。

■居然連唔同家庭成員嘅樣貌都認到。

■雖Note已推出，但高人氣仍吸引好多人玩。

■Tab7.7都有現身，試玩嘅更係4GLte版。

■Pawel：「聲控操作好方便，我太太再也毋須煩惱搵唔到遙控了。」

■Bonomi：「舉下手就操作到電視上網，充滿未來科幻感，期待正式推出時有更多實用玩法。」

視后艷壓全場

除咗善用肢體語言嘅「視帝」，三星場館另一邊廂都有「視后」助陣！稱得上「后」，當然要有番咁上下美艷。呢款號稱畫質最強嘅SuperOLEDTV，雖等到2012年年尾先正式推出，但現場已安放一台試驗中嘅工桯機，仲要係55"型號，其影像顯示品質已相當高。除咗3D呢啲必有元素外，機內更配備三星獨有SuperOLED技術，加上四核超強處理器，令影像運算更準確更細緻，畫質、色彩同樣亮麗，加上極大視角，絕對能吸引一切視線。

■採用獨有SuperOLED技術，令畫質相當細緻。

■藍色及綠色相當鮮艷搶眼。

■獨立眼仔係畀舊有電視用，但只支援《Skype》。

■55"型號，機身依然纖薄。

輕薄撐場

三星亦花咗極多位置力推人氣機王GalaxyNote，仲有畫家即場用Note幫人畫畫㖭！不過就人流所見，Series9第二代Notebook似乎更受歡迎，除咗外形一貫簡約靚仔，更薄到只有12.9mm厚、1.16kg重，攞上手就知有幾誇張，難怪唔少人對住部機狂影相。

第二代Series9
■Ultrabook今年發力，以不超過18mm厚度為標準。Series9僅厚12.9mm，比蘋果MBA更薄更輕。