我求大俠喺啱啱過去嗰個禮拜日晚，睇完曼城對曼聯英足盃賽事嘅球證鬧劇後，扭去免費台，亦睇到個音樂頒獎禮鬧劇，「Chok王」翻冧亞皆老街同太子道西最受歡迎男歌手之餘，仲攞埋金曲大獎，引證呢啲選舉真係冇公平。咁周一先舉行完嘅國際足協頒獎禮又點呢？睇番金球獎投票紀錄，葡萄牙教練同隊長好小器，幫晒自己友基斯坦奴朗拿度（C朗）之餘，仲想封殺美斯，可惜都係幫唔到C朗登基。
頭兩位選自己友
國際足協雖然成日都俾人話偏幫美斯，但都起碼夠透明度，上佢個官網就可以睇番各國教練、隊長同傳媒嘅金球獎投票意向，夠晒公開公平公正。
葡萄牙教練保羅賓度同隊長紐奴高美斯，支持同胞C朗就梗㗎啦，兩人都將首選票投畀呢位皇家馬德里前鋒；唔單止咁，連次選都揀埋自己友、曼聯翼鋒拿尼。第3選方面，保羅賓度都算有少良心，放番美斯落去；紐奴高美斯就揀巴西小將尼馬，真係夠出位。紐奴高美斯亦都係世界傳統十大足球強國中，唯一3個投票選都冇畀美斯嘅隊長。
美斯最欣賞沙維
美斯今屆攞成44.88%選票蟬聯金球獎，或者因為已經坐定粒六，佢以阿根廷隊長投票，就冇投畀自己；美斯嘅1、2、3選依次序係沙維、恩尼斯達同阿古路，兩個球隊隊友，一個國家隊隊友，都係益自己友。美斯就解釋：「佢哋3人都係十分出色嘅球員，特別是沙維，冇佢嘅助攻，我就冇咁多入球。」
另外，講埋香港球迷較關心嘅投票取向，好似香港隊長陳偉豪，佢嘅順序選擇就係恩尼斯達、沙維同美斯，擺明係巴塞躉。教練廖俊輝就選美斯、C朗同卡斯拿斯，都好正路。中國新任教練甘馬曹，嚟自西班牙就支持晒同胞，順序選擇係卡斯拿斯、沙維同恩尼斯達，隊長李瑋峰都一樣。