07年香港小姐冠軍張嘉兒出道即遇到不少批評，曾一度令她迷失方向，幸好慢慢適應下來，加上識了朋友及慧妍雅集一班師姐扶持，終於令她在香港有家的感覺。
張嘉兒在07年當選港姐冠軍時，曾被批評不夠靚，明明是港姐冠軍，卻遭嚴重打擊自信，加上初入娛樂圈，在香港又人生路不熟，嘉兒坦言：「嗰陣真係一時間失去自信心，個人冇咗方向，要好一段時間嚟適應，好在慢慢識多咗朋友，好似獎門人曾志偉、湯盈盈、宣萱、張美妮、苟芸慧等，開始覺得香港都有好多人關心我，良師益友，仲有加入咗慧妍雅集，有一班師姐，感覺唔再孤身作戰，舊年又同朋友合資搞語言中心，終於都真正落地生根，有家嘅感覺喇！」
戲癮大發
嘉兒現時在慧妍雅集義務做秘書工作，最近又孭起「212愛一愛昂步健康行」做搞手：「呢次大嶼山步行係第二次搞，我行過確保安全㗎！上年我都有叫屋企人同朋友參加，今年都唔例外，仲會叫埋語言中心嘅同學一齊行，齊齊做善事。」談到她與朋友合資的語言中心，雖只營運一年，但已能做到收支平衡，嘉兒最開心是自己的努力沒白費，覺得人生更精采、更充實。
問到還有甚麼目標？她說：「除咗西班牙文外，想開多啲英文班，自己演藝工作方面，之前拍《女警愛作戰》、《結．分＠謊情式》，愈演愈有興趣，不過仲有好多進步空間。」那感情方面又如何？嘉兒笑笑說：「未有着落，澳門睇NBA嘅男性朋友只係大家都喜歡睇籃球啫，感情慢慢嚟啦！」
採訪：汪芷寧 攝影：葉君海
