曼聯名宿曉士（圖）喺禮拜二晚正式做咗英超昆士柏流浪（QPR）嘅領隊，聽講佢仲有成2,000萬鎊（約2.4億港元）嘅擴軍費，打算羅致維拉前鋒戴倫賓特或布力般守將基斯杜化森巴。但係，QPR老細東尼費南迪斯之前亦承諾開水喉畀前主帥禾諾克買人，但到頭來，上年夏天淨係可以用1,000萬鎊簽入楊格、安頓費迪南同埋胡禮菲臘斯，所以我求大俠好懷疑曉士係咪真係有咁多錢用囉。曉士簽咗兩年半合約，年薪有成300萬鎊，喺英超只係低過費格遜、文仙尼同雲格；球會仲承諾今季成功護級嘅話，會再畀多100萬鎊獎金。至於曉士球員時代效力曼聯嘅戰友恩斯就兜踎得多，即將落實去英乙布里斯托流浪執教，叫有份工撈吓啦！