新一年頭一個月就發現電費、車費樣樣都要加，惟獨人工唔見有得加，想買車當然要諗過度過。雖然歐洲車、日本車加咗唔少，但韓國起亞（KIA）推出MorningLX仍然10萬元有找，計過日供才六十幾蚊。
記者：李鑒泉
攝影：譚盈傑
Model：Alia@PureModels
睇外表：統一家族飛鏢面罩
「究竟韓國車得唔得㗎？」這個問題不但是Alia，也是唔少準車主心中的疑問。但起亞近年大灑金錢在歐美成立設計及研究中心，從造車工藝、性能以至外觀，其實都有飛躍進步。早前廠方統一家族面孔，從Sorento、SOUL到新近的K5及K7等都有飛鏢形面罩設計，連入門的Morning也不例外，三格式巨型氣霸連霧燈及階梯式車頭，完全無「將貨就價」的感覺，廠方更指剃刀式頭燈靈感源自美式足球員頭盔，感覺惡形惡相，面對一眾歐日對手亦無半點輸蝕。
MorningLX3,595×1,595×1,490mm的尺寸亦絕不失禮，差不多2.4米長的軸距不但為後座乘客帶來充足腿部空間，更將後座翻平後的儲物空間大增，就算新年用來辦年貨都無問題。Morning行駕時感覺紮實，代理又提供5年保養，信心有保證。
講實際：配備慳油系統
過去10萬元以內的小車大多配備排氣量1公升的引擎，應付兩個人當然無問題，但另加兩位後座乘客時便顯得有心無力。今次MorningLX使用的1,248cc直四引擎，87匹馬力足以應付路面所需，而且12.2kg-m扭力更早於4,000轉輸出。不過四前速自動波箱有時太長氣，想行車更柔順記得keep轉數。另外有驚喜的是這副引擎竟然配備「ActiveECO」系統，電腦會控制引擎轉數、轉波時間及冷氣輸出，廠方指油耗較平時低一成左右，平均每公里約$1有找，算是有交代。
計一計：
雖然今次測試的LX版本換走EX版本車頭的LED日光燈、電摺鏡及車身裙腳，以及將指揮燈移回頭燈旁，但如非細心睇卻很難察覺兩者差別，反而14吋輪圈更有助Morning達致慳油效果，至於是否值得用$18,000去升級就見仁見智。在慳得一蚊得一蚊情況下，$99,999的定價確是一大吸引力，以供60月車會計算，每月平均供款都是$1,896，每日只是$63！
車價：$99,999
年利率：2.75%
年期：5年
月供：（$99,999×2.75%×5+$99,999）/60月＝$1,895.8
日供$63.2！
網上玩車身配色
一般車廠大多只為Supercar或豪華房車設立專屬網頁，但KIA卻為Morning（外國稱為Picanto）設網頁，除模擬整棟陳列室並按樓層分別介紹外觀、內櫳及引擎外，更有外國撞擊測試的模擬畫面，用來解釋Morning的車頭設計如何能保障駕駛者及路人，十分過癮。準車主仲可以上網配襯車身顏色，想點襯就點襯。
MorningLX
引擎：1,248cc直四
馬力：87ps/6,000rpm
扭力：12.2kg-m/4,000rpm
傳動：4前速自動波，前輪驅動
售價：$99,999
查詢：27609933（起亞汽車）