蘋機會:750吋3D環迴 全套AV戴上頭

蘋機會:750吋3D環迴 全套AV戴上頭

終日匿喺屋企,也無助脫毒!既然等運到,不如關上房門,享受吓一個人嘅3D小天地。講緊嘅唔係電視機,而係由SONY設計首部頭戴式3D眼鏡HMZ-T1,佢除咗內置5.1耳筒,唔驚半夜三更嘈親人之餘,畫面更可模擬出750吋螢幕效果,簡直就將成套家庭影院戴上頭嚟嘆!

記者:陳國輝
攝影:劉永發

超科幻設計 四眼仔照戴

小記同好多朋友一樣,都係四眼仔一名;最麻煩嘅時候,係當你入到戲院睇3D電影,又要戴住兩副眼鏡嗰陣,真係極唔舒服!咁都算,最難頂係副3D眼鏡仲周不時跣一半落嚟,若然你一手攬住女友,另一隻手拿起爆穀不斷喪食,試問仲邊有空閒不停托起副眼鏡?
Sony呢副T1就唔同,有晒空間容納你副近視眼鏡,兼且頭頂有埋軟墊架,唔怕動作大而移位。外觀亦好靚,弧形加上黑白色設計,似足《X-Men》雷射眼!但講到「睇」法,佢同一般3D眼鏡根本係兩回事;T1內置兩個OLED幕屏,水平視野就達到45度,而因為直接戴上頭,更可模擬出750吋超闊屏幕效果,效果媲美IMAX戲院!但留意,其實T1都唔算輕,重量大概有420g,約莫係三部iPhone,若然戴住睇一套180分鐘電影,真係會頸痠囉!

■Menu畀你選擇4種影像以及音樂模式。

■戴得穩唔穩,主要就靠呢塊前額軟墊嚟承托。

■採用流線型設計,並提供索帶,方便戴上。

750吋有幾勁?

■試玩3D版《VirtuaTennis4》,球手遠近走位好立體,最誇係超近鏡加慢動作,個波好似飛埋嚟!

■播放《哈利波特》3D版,唔止視覺上好似俾火包圍咁逼真,仲有5.1環繞立體效果,幾乎有燒埋身嘅感覺!

調校功能一味靠摸

享受呢種超逼真實驗,都講求習慣,除咗戴上較為笨重嘅裝置,你仲要摸熟機身每粒按鍵嘅用途。T1底部暗藏Menu鍵、四方向掣以及調校焦點嘅功能,你可以透過簡單操作,揀選自己鍾意嘅電影模式,例如Standard、Cinema、Vivid以及Custom,又或者另外四種音樂效果;但問題係,你必須戴上眼鏡先可以揀,亦即係話,操作時就要靠摸!小記試用一陣,近乎全程要Sony專人協助,不過想完全熟習亦唔係無辦法,畀多少少時間啦!

■Menu按鍵喺底部,要戴住嚟㩒有啲難度。

■跟機附送一部裝置,必須經佢再轉駁至播放裝置。

■提供5.1嘅環繞音效耳筒,可惜無得揀入耳式。

■喺眼鏡臂位,亦提供調校音量嘅按鍵。

Profile

顯示:OLED×2
解像度:1,280×720
屏幕尺寸:16比9
音效:5.1聲道
重量:約420g
查詢:SONY(23452966)