錢嘉樂同湯盈盈拍拖4年，最近阮兆祥踢爆話佢哋5月結婚，噚日嘉樂仔同伍允龍出席《功夫傳奇》節目主持李嘉喺尖沙嘴開嘅「東方體育會」開幕活動時，就解釋係一場誤會，佢話呢排好多圈中人結婚，通常記者都會問結婚話題，阮兆祥就獻計教盈盈答5月，不過未知邊一年嘅5月，點知講完5月，之後嗰句「唔知邊一年」大家聽唔到。
「希望三年抱兩」
咁究竟嘉樂同盈盈幾時拉埋天窗？嘉樂起初仲推三推四，話今年洪天明結婚，唔好搶天明風頭，不過追問多兩句，佢就話：「婚一定會結，但今年太多工作，等做晒手頭上工作先。」做埋今年工作咪即係2013年結婚？嘉樂忽然認真咁話：「3年內啦！唔想太倉促，我都大個仔，今年46歲，盈盈細我10年，我亦都鍾意小朋友，希望三年抱兩，不過我係咁講啫！仲要佢肯至得，而且我哋未正式plan過結婚。」
另外，伍允龍同緋聞女友鍾嘉欣之前影嘅親密照曝光，講起呢件事佢大耍太極：「保持私穩，希望大家專注我嘅工作。」