【本報訊】「我要保衞嘅唔單止係住嘅環境，更加重要係我嘅生活，我嘅回憶。」當不少90後少女唱着K、打着機，16歲的小瑛半跪在地上，用血紅的漆油寫着標語。這裏是流浮山虎草村，一個地圖上尋不着的一點，存在和消失，似乎和這世界沒任何關係。「但我地三四代人已經喺呢度住咗半個世紀，點解可以叫我地話走就走？」面對財雄勢大的神秘發展商，今年唸中五的小瑛，誓要保衞家園。記者：譚志輝、梁婉珊、麥超億、劉漢權
由浮山市集駕車約5分鐘，看見路旁的樹林忽然出現數張血字大橫額「毀滅虎草村」，記者才驚覺已到了村口——村子實在小得毫不起眼。聽到有外來車輛停泊，10多個村民如驚弓之鳥，湧出村口，當中包括小瑛。「你哋係乜嘢人，嚟做乜嘢？」記者表明身份來意，村民還是眼帶疑惑。「我點知你哋係咪間諜？尋日凌晨先有人斬呢棵樹，仲用貨van撞。」小瑛指着村口旁只剩半米樹幹的「樹」質問。
忽然有人斬樹收地
記者幾花唇舌，小瑛才放下戒心，領着我們在村內走。「嗰朝我返學呢度仲係一大片林地，呢度仲係一條小溪，我最鍾意喺度捉蝌蚪，但家……」眼前是一大片被鐵絲網圍起來的黃土地，被鏟泥車移平的痕迹還未被風吹走，只剩一棵2米高的樹。
據城市規劃委員會分區計劃大綱圖，這裏是屬於海岸保育區範圍內的樹林。「爸爸同叔叔經常都喺度踢波，佢地憑咩，傾都唔傾就鏟走晒？」小瑛埋怨着。
小瑛帶我們到鄰居陳小姐家裏，翻看數十年前的舊照：「我爺爺嗰輩戰時落到嚟香港，有親友喺附近住，佢就喺度開地種田打魚。我出世紙都寫我係虎草村出世！」
一直以來都沒人收租，但去年9月起，這條平靜的小村不能再平靜下去。有神秘人自稱受業主委託前來收地，滋擾不絕：「個業主從來都冇露面，淨係有班人喺度做嘢。有朝一起身，嬸嬸嗰果園就畀鐵絲網圍住；又或有幾棵樹斬咗。佢哋成日都趁凌晨大家瞓晒先做嘢。」
上月初，村民收到律師信，要求12戶數十名村民於上月底搬走。自此有人更變本加厲：「用車撞樹，仲話要起石柱封住村口，話我哋唔走就永遠唔好走！」
「只想一世喺度生活」
除了律師信和日益頻密的恐嚇，對方甚麼都沒留下，遑論賠償。「唔通叫我哋走出去瞓街？」小妮子咬口切齒，「咁樣太霸道，我仲係細路女，唔係唔怕事，但我要話俾佢哋聽我哋先係呢度嘅主人」。
近日小瑛大考臨近，課業繁重，但對方的壓力日增。每天一放學就趕回家，監察村內的一舉一動。原來怕事的村民也組織起來頻頻開會商討對策，包括找來忙於參選特首的何俊仁協助，誓與對方打一場逆權侵佔的官司。
「我覺得唔單止係住嘅問題，呢度係我嘅生活，係大家嘅回憶；屋可以搵過，但生活回憶唔保住，就要永遠失去」。記者連續探訪小瑛多日，她坦言：「我覺得自己同同學嘅生活好唔同，我好少玩、好少消費。我享受嘅係喺岸邊睇住媽媽、婆婆剝蠔曬蠔，吹住海風溫書，幫鄰居種吓田，有伯伯打完魚同我哋一齊分。我只想一世喺度生活。」
晚上10時，小妮子關上燈，看着對岸深圳的點點燈光，只盼望這個卑微的願望得以實現。