過去數日曾拒絕記者採訪的賴應虒，上周六突然與記者在荃灣街頭相遇，賴專員邀請記者到茶餐廳面談，談話內容節錄如下：
記：記者賴：賴應虒
記：對於你用AM車接女友，你覺唔覺係公器私用？
賴：我係順路要交文件俾佢（女友），好似今日咁，我要托佢，我爸爸又行動唔方便，有時要做啲文件，惟有揀放工時間。
記：會唔會一個星期幾次？
賴：唔會，唔會。
記：你剛才話一個月一次左右？
賴：次數可能非常之少，可能佢啱啱要離開去攞返架車，一次半次，絕對唔係經常性咁樣。
記：作為一個政府官員，你剛才話唔牽涉咩問題，其實唔係架，有陣時一次就夠喇……
賴：純粹係人之常情，可能等我放工放得夜，一個女仔，經過幾條路，亦都係順路，人之常情啫，大家都係人，我承認嚴格來講都唔應該咁樣，唔應該濫用，絕對唔係濫用。
記：賴生承唔承認一次都唔應該？
賴：盡量避免啦應該要，盡量避免啦！
記：覺唔覺得係錯？
賴：技術性來講，要避免……路過，坦白講幾個街口，我又順路返屋企，另一個角度佢都係步行返去。即係一個禮貌性，一個offer，需唔需要我載你攞返架車呀？純粹一個人性角度睇啦！
記：從一個濫用嘅尺度講?
賴：你唔可以講係濫用，一句講晒，你話我技術性都唔應該，一次半次都唔應該，但從人性角度……
記：咁係咪一次呢？
賴：如果經常性係咁，我唔啱啦！有時我交完俾佢，佢都未走住架，咁就唔需要㖭啦！我作為一個男性，可能我技術性犯左規都未定，我承認，但係從人性嘅角度，我冇錯喎！作為我關心佢安全呀咁樣，一個offer俾佢囉。可能我技術性啦，我唔知啦，部門會處理，做錯咗咪罰我囉，懲罰我囉，處分我囉，係咪先？我唔係去狡辯。原來一個offer係犯咗規，你做完訪問，我對唔住囉！
記：以後會唔會小心啲？
賴：會，我會改善番囉！我唔會刻意咁做囉，人之常情咁解。如果我有犯規，我咪受罰囉，如果我冇犯規，我咪唔使受罰囉。呢啲我唔係專家，我唔知道公司行政規定。如果你作為一個市民，都唔會覺得我係犯規，係濫用的情況。我承認，做錯咪受罰囉！
記：咁係咪佢買完嘢車佢返去就唔得呢？
賴：咁梗係唔得啦！Shopping果啲梗係唔得啦。
記：車去一個食飯的地方都唔得啦！
賴：梗係唔係啦！或者我唔係住呢區，如果我住沙田，特登車佢嚟呢度，梗係唔得啦！我日頭係官員啫，換左件衫好似家咁就係一個小市民。我又唔係作出咩犯法行為，如果我係作咗犯法行為，就值得去報道啫。我希望你作出一個好嘅抉擇啦，咁樣都係造福市民，從一個小市民嘅角度睇，係冇好處。