無綫前晚舉行的《2011年度十大勁歌金曲頒獎典禮》賽果驚人,無綫寶貝仔林峯三連霸成為亞太區最受歡迎香港男歌星,而他的一首《Chok》更爆冷奪金曲金獎,即時引起全城瘋插,王喜在微博留言:「我住亞皆老街也沒聽過。」樂壇獎王陳奕迅也抵死上載chok樣照寸爆林峯。
被視為歌手成績指標的無綫《十大勁歌金曲頒獎典禮》,自從三年前無綫和五大唱片決裂,寶貝仔「Chok王」林峯爆冷成為亞太區最受歡迎香港男歌星後,《勁歌》的公信力隨之下降,前晚的賽果更加嚇人。王菀之爆冷奪得亞太區最受歡迎香港女歌星獎,林峯不但三連霸成為亞太區最受歡迎香港男歌星,連一向被視為樂壇全年歌曲No.1的金曲金獎也爆大冷,由林峯的冷門歌《Chok》奪得,賽果令人質疑。
逾兩萬網民Dislike
林峯連奪兩個大獎後,大批網友及圈中人即時在網上炮轟賽果,由宣佈他得獎後到昨日傍晚時分,已有超多網民在網上圍插《勁歌》賽果,facebook的群組AKZone也設網上投票區,題目為「林峯再度成為亞太區最受歡迎男歌手,更憑《Chok》一曲打贏《天梯》拎埋金曲金獎,如果Like=Dislike,會有多少人dislike呢?」結果有23,000多人說「Like」,即不滿林峯攞獎,不少人直斥造馬,高呼樂壇已死。
就連大批圈中人也睇唔過眼在微博宣洩不滿,王喜說:「我住亞皆老街也沒聽過,甚麼來的?」前晚捧蛋而缺席的何韻詩說:「剛剛路過,偷偷一看,輕輕一笑,悄悄飄遠。」郭富城經理人小美寫道:「病到眼花……睇埋電視直情暈得……超冇眼睇!」
陳奕迅Chok寸林峯
樂壇獎王陳奕迅(Eason)前晚沒有出席頒獎禮,也忍不住在微博上載一張拿住《勁歌》獎座扮攞獎的chok樣照片,更抵死地在電視機螢幕前扮嘟嘴親吻獎座,他寫道:「我chok咗成分鐘都等唔到個特寫……Churrrrr……」明寸林峯。Eason的微博即時引來3,000多名網民評論,正專心安胎的楊千嬅回應Eason說:「吹神,你已經係神,超越影音畫面,不過都有點懷念我們從前在頒獎禮,鏡頭後的說說笑笑。」林憶蓮昨日在九展提到林峯憑《Chok》得金曲金獎,她說:「我冇乜意見,我亦冇聽過佢嘅歌同睇佢嘅戲,只係見過佢個chok樣。」
林峯前晚出席慶功宴時意氣風發說:「我都唔知一晚chok兩次,係開心嘅,可能太激動,尤其最後一個獎(金曲金獎)。」被全城鬧爆的他更下戰書,坦言想挑戰奪最受歡迎男歌星獎,希望有機會集齊一套獎座,他說:「但家仲要努力。」
而在四個頒獎禮共奪14個獎、成為女歌手大贏家兼且7度奪最受歡迎女歌星獎的容祖兒,前晚在慶功宴心情興奮說:「能夠由23歲攞獎攞到32歲係好不可能嘅事。」對於奪獎次數已超越梅艷芳,她說:「好難同梅姐比較,佢地位超然,對我嚟講,佢喺天堂係另一種天后,係我榜樣。」
廣管局接25宗投訴
而跟祖兒常在頒獎禮鬥咀互窒的Eason,日前自稱已升級為大中華區國際級歌手,祖兒得戚說:「大家唔好忘記佢亦都係爛片王,喺電影界未來嘅日子要花多啲時間,只係顧住樂壇嘅嘢冇用,再唔係我都係爛片王,大家開爛片聯盟。」
無綫和廣管局就前晚《勁歌》頒獎禮共接獲35宗投訴,其中無綫方面接獲10宗投訴被指賽果不公,對林峯攞獎及Twins未被列入組合候選名單感到不滿。至於廣管局則接獲25宗投訴,指賽果不公及主持人言詞粗俗。
採訪:胡比、王連連、馬建華
攝影:仇志德、陳慧安
學友黎明四奪金封王
無綫《勁歌》頒獎禮另一焦點為金曲金獎,回顧歷年紀錄,張學友和黎明分別四次稱冠,譚詠麟和張國榮則分別得兩次,得獎歌曲均為大家耳熟能詳的hit歌,但近年樂壇青黃不接,林峯前晚更憑《Chok》奪金曲金獎,備受外界質疑。
歷屆勁歌金曲金獎
84年《愛在深秋》譚詠麟
85年《愛情陷阱》譚詠麟
86年《有誰共鳴》張國榮
87年《無心睡眠》張國榮
88年《祝福》葉蒨文
89年《夕陽之歌》梅艷芳
90年《焚心以火》葉蒨文
91年《每天愛你多一些》張學友
92年《分手總要在雨天》張學友
93年《袛想一生跟你走》張學友
94年《那有一天不想你》黎明
95年《離開以後》張學友
96年《情深說話未曾講》黎明
97年《只要為我愛一天》黎明
98年《我這樣愛你》黎明
99年《插曲》鄭秀文
00年《少女的祈禱》楊千嬅
01年《ShallWeTalk》陳奕迅
02年《明年今日》陳奕迅
03年《我的驕傲》容祖兒
04年《小城大事》楊千嬅
05年《無賴》鄭中基
06年《愛得太遲》古巨基
07年《花落誰家》李克勤
08年《囍帖街》謝安琪
09年《搜神記》容祖兒
10年《男人信甚麼》衞蘭、JW
11年《Chok》林峯
資料來源:《蘋果》資料室
網中吟「樂壇真的玩完了」
林峯一曲《Chok》爆冷奪金曲金獎後,隨即在各大討論區被鬧爆。
kingwinwin:「恕我膚淺,chok呢個字今年的確聽好多,但《Chok》呢首歌我真係冇聽過,一聽完,我只可承認香港樂壇真的玩完了。」
HoChingTsang:「認真嗰句,成首歌高潮位又冇,唱嚟唱去嗰幾句,差唔多背歌詞嘅力都慳番。」
KamanLiu:「金曲金獎?但我未聽過隻歌!你chok得起都拎唔穩個獎啦!樂壇已死!」
HelenNg:「《Chok》都攞到金曲金獎?咁《天梯》應該攞神曲神獎,《那誰》又要攞榮耀金曲鑽石大獎!D&G門口都有人集會,無記門口咁大都可以容納幾多人㗎?」
NICK333:「我都笑咗出嚟呀,有創意呀620(樂易玲)。」
資料來源:AKZONE、香港討論區