應屆19位準亞姐噚日喺亞視進行大都會魅力小姐選舉宣傳，1,500部香港的士可以投票，佳麗仲即場投選自己心水。大會安排佳麗着短裙示人，但好多佳麗上落的士都走光，3號井上雪莉、18號王家敏唔覺意露底，1號洪利朱仲露埋內衣，認真失禮。
身材高䠷嘅2號林汧安落的士時用手撳實條裙，狀甚狠狽，佢接受訪問時話有信心可以入三甲，又話：「19號馮雪冰、6號裘琳、12號阮艾娟也很棒。」問林汧安點準備？佢話：「心情放輕鬆，儀態上要好好準備。」11號陳一荻俾人話佢肥，佢話家積極瘦身：「我有吃少一點，做運動，但效果不大，特別是腰肉很難減。其他佳麗教我吃少一點，但我覺得不是選模特兒，有點肉會顯得有褔氣。」
應昌佑無懼封殺
準亞姐前晚喺尖沙嘴綵排跳舞，任表演嘉賓嘅應昌佑前晚現身同佳麗排練，佢話第一次見亞姐，未有深刻印象，相信到時會有貼身動作，仲強調係公司安排。
怕唔怕俾無綫封殺，應昌佑話：「唔會，公司希望我做唔同嘢，係唯一嘅表演嘉賓，會盡力做，唔想得罪任何電視台，自己都5、6年冇出唱片，唱片難做，但冇氣餒。私底下同黎明（Leon）、經理人都有傾偈，Leon畀好多鼓勵說話我，亦都冇話放棄我嘅念頭。」