「杜奧巴，很想去捕捉他」，今時今日最想捕捉杜奧巴嘅人，就係中超上海申花班主朱駿；呢位網絡遊戲公司老闆，就喺自己嘅微博度暗示，杜奧巴將會係佢主力遊戲《Firefall》最貼切代言人，睇嚟杜奧巴同安歷卡喺申花重組雙箭頭，好有機會成真。
傳360萬周薪誘杜奧巴
朱駿噚日上午就係個人博微出帖：「『帶槍的魔獸』，已經一億美金的投入的《Firefall》，產出效果就像阿凡達再世......誰是最貼切代言呢？左想、右想，中國、韓國、歐洲所有員工一致表決，還是他！暈........」雖然朱老闆冇表明代言人係邊個，不過杜奧巴一早有魔獸外號，一身肌肉同機械人冇分別，而且安歷卡加盟初期，已經拍咗《Firefall》宣傳照，冇晒神秘感，朱駿咁大投資落去個新game度，代言人一定有咁爆得咁爆。
講真，英國傳媒呢幾日已經不斷報道杜奧巴嘅轉會消息，傳到申花出到30萬鎊（約360萬港元）周薪，利誘呢位科迪特瓦隊長來投，淨係宣傳價值，朱老闆已經賺晒；而且中超另一豪門廣州恒大，亦都發出官方聲明，表示球隊無意簽入杜奧巴，申花機會又高一截，不過杜奧巴已隨國家隊出戰非國盃，最遲打到2月底，暫時都應該未正式落實住。
安歷卡獲皇帝式招待
睇番申花對外援出手都好闊綽，球隊已經幫安歷卡準備好一楝別墅作為宿舍，不過基於私隱就冇透露詳細地址；另外，大手筆為安歷卡準備好私人物理治療師吳宏祥；來自台灣嘅吳宏祥來頭不小，曾經係英超保頓物理治療師，醫過安歷卡，所以教練泰簡拿就特登禮聘吳醫師，全程照顧安歷卡。據報下周日（15日）安歷卡就會正式歸隊，睇嚟朱老闆一定搞個大型歡迎會。