加利仔nice爆抵港！舊年掛靴嘅前曼聯右閘加利尼維利（左），噚日輕裝低調訪港，準備今午4點至9點喺尖沙嘴曼聯餐廳舉行嘅簽名會，同埋與球迷聚餐嘅活動，而截稿前都仲有位。
36歲嘅加利仔噚日黃昏取道大馬低調抵港，但都有5、6個忠實球迷收到風，由機場跟到去紅磡一酒店。我求大俠亦有跟埋一份。呢位前英格蘭國腳亦非常nice，搭完長途機，上酒店稍息半個鐘，被守候酒店大堂嘅球迷包圍，要求簽名、合照都有求必應。之但係一問佢有冇諗過學隊友史高斯咁復出，佢就借咗「聾耳陳」隻耳，仲一反佢「跑得慢、冇速度、唔夠快」嘅特質，一支箭咁就飛上車跟曼聯餐廳公關出去醫肚。據報佢會留到周三先走，紅魔粉絲要留意啦！