以意大利品牌自居嘅「達芬奇家具」，被踢爆將內地生產嘅家具產品出口再轉銷內地，早前已鬧得滿城風雨。點知事件餘波未了，今次連帶香港上市公司高層都捲入其中，要辭職避嫌。呢位就係文化中國傳播（1060）行政總裁崔斌（圖），搞到要賣座電影《讓子彈飛》出品人兼公司董事長董平臨時頂上，為公司收拾殘局。
被指敲詐勒索
事緣形象插晒水嘅達芬奇向崔斌求救，搵咗崔斌做中間人，達芬奇同佢簽咗為期3個月、總值300萬人民幣嘅公關合同，希望平息造假事件；點知後來傳出另一版本，話係記者「故意編發虛假報道，並聯同崔斌等人對達芬奇進行敲詐勒索」。文化中國有份參與發行同廣告營銷嘅《京華時報》，發覺事件一發不可收拾，免去崔斌總經理職務。為免火燒連環船，崔斌索性辭埋文化中國職務。
文化中國仲話，內地傳媒關於崔斌嘅報道同公司無關，實行同崔斌劃清界線。崔斌曾被譽為「中國十大傳媒經營人物」，今趟真係老貓燒鬚，仲搞到周身蟻。