噚日終於暖返，最高有攝氏18度，唔太涷又唔太熱，最啱郊遊。身兼本報財經版專欄作家嘅健康空氣行動副主席黃元山就帶埋老婆，出席健康空氣行動同深水埗區議會合辦嘅單車日，踩單車之餘仲可以拍吓拖，真梳乎。
黃元山引述環保署資料話，舊年本港路邊二氧化氮嘅濃度，係有紀錄以來最嚴重，而全中國最低係新疆烏魯木齊，就連北京同上海都好過香港，仲話自己係國際都會喎，難怪跨國企業唔肯嚟香港設立地區總部，搵到錢都未必有命享啦。
黃元山一向有哮喘同鼻敏感，佢話舊年發作得特別多，條氣唔多順。佢仲好忟憎咁話，就算政府提出新標準，同世衞仍差一大截，睇政府自己公佈嘅數字，就知道佢哋環保政策幾有效！華華都不禁問：我哋嘅藍天去咗邊？