在冬天的下午，最寫意的生活莫過於歎一件甜品，佐以一杯紅茶。原來，紅茶屬於秋冬茶，能夠補益暖胃，保護心臟健康。今次教大家用紅茶入饌，以茉莉花茶做曲奇、將伯爵紅茶變成慕絲杯，有此芳香的甜品，人生如此，夫復何求？
記者：陳芷慧
攝影：李玉梅、楊錦文
V壹網：http://www.vdonext.com/index.php?fuseaction=Features.Archive&channel_id=575603&program_id=2639371
睇片即上
留言電郵：mailto:[email protected]
今日煮腦
YvonnePoon（食譜作者）
著有《自家製美味甜品》，2010年為意大利Moleskine袖珍旅遊筆記本邀請編寫甜品食譜，在city’super展覽。
煮題 冬季甜點之紅茶
茉莉花茶香檸曲奇
用上茉莉花茶做的曲奇，味道清香，再配上清新香檸味，份外怡人，是不錯的下午茶點！
材料
無鹽牛油（室溫放軟）110克、糖霜50克、鹽少許、低筋麪粉160克、杏仁粉40克、茉莉花茶包（拆袋弄碎）3包、檸檬皮（刨碎）1個、杏仁條30克、糖粉適量
做法
1.低筋麪粉及杏仁粉過篩，混合成麪粉混合物。
2.無鹽牛油用打蛋器打至鬆軟呈乳白色，加入糖霜由慢至快速打勻，下鹽，分兩次加入麪粉混合物，每次拌勻，用手搓壓成麪糰。
3.加入茉莉花茶葉、檸檬皮、杏仁條搓勻，放入保鮮袋，搓成長形，用硬卡紙捲實，套上橡筋，放入雪櫃雪30分鐘至硬身。
4.將麪糰切成每塊7毫米厚的曲奇，在曲奇邊沾上糖粉，放在鋪有焗爐紙的焗盤上，放入預熱至160℃焗爐，焗20分鐘，即可。
貼士
刨檸皮時只要黃色部份，若刨到白色部份便會有苦澀味。
杏桃紅茶磅蛋糕
這個杏桃紅茶磅蛋糕，加入了杏桃乾果，令杏桃味更突出，隱約嚐到淡淡的茶香！
材料
無鹽牛油（室溫放軟）/低筋麪粉各125克、砂糖40克、轉化糖20克、雞蛋（拂打）2隻、泡打粉21/2克、杏桃乾（剪碎）120克、冧酒20毫升、杏桃紅茶包（拆袋弄碎）5包、糖水適量
做法
1.杏桃乾果加入冧酒拌勻，浸1小時至完全吸收，備用。低筋麪粉、泡打粉過篩後混合成麪粉混合物。無鹽牛油用打蛋器打至鬆軟，加入砂糖、轉化糖後快打至鬆發，分數次拌入雞蛋，每次拌勻。
2.加入麪粉混合物，用打蛋器由慢至快速打至無粉粒，加入杏桃茶葉、杏桃乾拌勻成麪糊。將麪糊倒入模中至八成滿，中間切一條坑紋，放入預熱至170℃焗爐焗20分鐘，取出在深坑輕輕再一刀，再放回焗爐多焗20分鐘，出爐後塗上糖水，切片即成。
貼士
蛋糕焗20分鐘後取出，在中間深坑位再割多刀，可令蛋糕膨脹得更完整。
伯爵紅茶牛奶蜜糖慕絲杯
伯爵紅茶茶味香濃，用來做慕絲杯，中和了朱古力的甜膩，更添層次！
材料
紅茶朱古力慕絲：朱古力（66%）110克、牛奶400毫升、伯爵紅茶葉15克、魚膠片（浸軟）6克、砂糖25克
牛奶蜜糖慕絲：牛奶250毫升、鮮忌廉250克、呍呢拿條半條、魚膠片（浸軟）6克、蜜糖40克、砂糖10克
裝飾：忌廉（加25克砂糖打起）200克、玉米片/杏仁（切粒）各適量、豆蔻粉少許、薄荷葉/馬卡龍各3片
做法
1.呍呢拿條刮籽，籽及條分別備用。做紅茶朱古力慕絲，鍋中放牛奶、砂糖、伯爵紅茶葉煮至微滾，熄火，加蓋焗5-10分鐘，放魚膠片拌煮至溶，隔篩過濾成魚膠奶茶。
2.將少許魚膠奶茶倒入朱古力中，待5分鐘至朱古力軟身，拌勻，倒入餘下的魚膠奶茶拌勻，倒入杯中至三成滿，放雪櫃雪約30分鐘至凝固，備用。
3.做牛奶蜜糖慕絲，鍋中下忌廉、牛奶、砂糖、呍呢拿條、呍呢拿籽，開大火煮至微滾，熄火，下蜜糖、魚膠片拌煮至溶，過篩倒入碗中，放凉成牛奶蜜糖慕絲。在紅茶朱古力慕絲上放玉米片，倒入牛奶蜜糖慕絲至八成滿，放雪櫃雪半小時至凝固。
4.做裝飾，將已打起的忌廉放入唧袋中，在慕絲杯唧上忌廉，放玉米片、杏仁，灑上豆蔻粉，插上馬卡龍及薄荷葉。
貼士
做朱古力慕絲時，牛奶紅茶一定要煮熱，才可倒入朱古力中，這樣朱古力與牛奶紅茶才會完會融合。