拍拖多年的錢嘉樂和湯盈盈一直玩低調，從未正式承認戀情，亦甚少被影到拍拖照，不過近日有傳兩人計劃結婚，前晚盈盈樂樂結伴出席洪金寶（三毛）的壽宴，形影不離，湯盈盈直認雙親對嘉樂印象不錯，更不時被身邊老友催婚。
洪金寶前日60歲大壽，大仔洪天明前晚於天后包場為老父開派對慶祝，原本身在外地的胞弟洪天祥、洪天照以及胞妹洪煦榆，亦秘密返港給老父驚喜，反而洪金寶老婆高麗虹則未有現身，略為美中不足。另外一眾好友包括譚詠麟（阿倫）、曾志偉、彭健新和岑健勳等均有到賀，相當熱鬧。
盈父滿意嘉樂仔
近日傳婚訊的錢嘉樂和湯盈盈亦有到賀，兩人面泛紅光似飲過酒，其中嘉樂面對鏡頭時四萬咁口，反而盈盈甫見記者影相，即第一時間擰轉面。昨日盈盈到鑽石山宣傳新劇《換樂無窮》，她再次否認5月結婚：「係祥仔（阮兆祥）教我隨口答，點知連屋企人都信以為真，問我點解結婚都唔講。」
盈盈聲稱雖然和嘉樂感情穩定，但未打算結婚，但她坦言在洪金寶的派對上，不停被人催婚。之前有記者訪問湯父，追問他對嘉樂的印象，盈盈謂：「記者真係嚇佢一跳，印象？OK喇。」
至於當晚洪金寶派對，洪天明跟未婚妻周家蔚送上足金Q版公仔，天明透露為保持神秘，事前不讓老父知道有驚喜派對，誰知老父曾一度表示未必到場，險些浪費一班仔女的心機。飲到面紅紅的洪金寶接受訪問時說：「我生日希望梗係長命千歲，我想成日見吓老友，年年開心。」
生日願望恨抱孫
提到天明為遷就洪金寶拍戲而推遲婚期？他聞言說：「吓，等我呀？咁我就聽佢哋話，佢哋想點就點。」未來新抱周家蔚全程打點一切，洪金寶即大讚：「Verynice，verygood！」生日願望會否最想下年抱孫？洪金寶笑說：「諗就係咁諗，但唔可以催，順其自然！」
採訪、攝影：羅德光