蘋機會：驚人！1秒10張RAW　Nikon日落殺手

盛傳Nikon機王趕在CES前曝光，果然無錯，旗艦級D4終於喺6號與日本同步發表！全片幅感光元件早為人所知，但叫龍友最發燒，除咗超強51個對焦點、10張RAW高速連拍及1080p全高清攝錄外，微時拍攝（定時快門間隔）更幫你慳番唔少時間，只要Set定部機，就拍攝到日出日落嘅情景，輕鬆至極。

記者：陳國輝
攝影：伍慶泉

攝影師：為記者而設嘅相機

由於與日本同步，Nikon一直將消息收得好密，直至到6號中午12點後，才正式宣佈D4誕生！第一時間，場內半百媒體當然想搶先試玩呢部旗艦級機王，點知因工程機關係，Nikon拒絕讓記者插入記憶卡拍攝照片。雖然未玩到百分百真身，作為Nikon粉絲，能感受到D4嘅鎂合金硬殼和拍攝時嘅痛快手感，相信都係值得。
數到D4新增功能，十隻手指都唔夠用，拍友對呢部單反機各有不同評價，例如本報攝影師Kenny就話，因為D4用到最大光圈f/8鏡頭，而且中央及兩側共11個對焦點全部都可以用，就算環境再暗，都能夠輕易拍攝。另一位雜誌記者Rex亦大讚，最鍾意新增嘅微時拍攝，因之前影日落、日出甚至颱風變化等環境，非常困難，呢項功能可以畀佢哋Set定腳架，調校好模式，就等相機自動拍攝，方便得多。

■機王發佈，吸引到過半百傳媒出席。

■為方便攝錄，機頂可加裝收音咪。

■攝影師Kenny認為，D4機能似專為記者而設。

高速拍攝迎奧運

傳聞話，D4係為咗今年倫敦奧運而推出，事實係點唔重要，最難得D4提供高速運動時嘅拍攝能力！例如佢以最高容量嘅RAW格式拍攝，能以每秒10幅嘅速度，連續狂影100張！儲存媒體方面，除提供CF卡槽，也支援全新嘅XQD記憶卡，速度更高達每秒125MB，要抄寫「激激聲」嘅照片或影像，幾秒就搞掂！至於新加入嘅D-Movie短片拍攝功能，便支援1080p（30fps），淨係呢一點，已比上代D3S嘅720p進步。