本欄於一月六日寫廣東話詩詞，讀者K來郵支持，多謝你撐粵語。但讀者K所言：「民國初年，亦曾以粵語作國語，惜被大炮孫否決……」此傳言聽過好多次，左丁山讀小學時，先父一輩叫孫文做大炮孫，佢都講過呢個古仔，但相信係野史啫，到目前為止，未見有學者，歷史學家搵到確實證據支持此說，大概係廣東人對辛亥革命，推翻滿清，創立共和嘅貢獻最大，犧牲最多，但建立民國後，一切依舊，仍然係北方人話事，北方官話為國語，條氣唔順，先至有此傳聞啫。蘋果讀者群最多專家，如有讀者對「粵語幾乎成為國語」有新資料提供，請告知。
一月五日本欄講大學賺錢，俾立法會議員批評，提醒大學要做到帳目分明，唔好俾議員及審計署抓到辮子。左丁山經常以為本地大學有越多錢越好，最好追得上史丹福㖭，追上哈佛就未免發夢嘞。一位讀者L來郵話：
「本人為某大學之教員，關於閣下之文章，本人有以下資料提供：
1.在我校，自資課程使用課室，是需要付租金的，UGC課程則是免費。
2.教員的薪金，幾乎沒有一個不是UGC經費＋自資課程經費支付，如果沒有了自資課程，單靠UGC經費根本不能維持UGC課程。
所謂UGC補貼自資課程根本是別有用心的政客顛倒黑白，我看到的只有是自資課程補貼UGC課程。」
呢位讀者L嘅資料幾新鮮，可供參考，請尊貴的議員特別注意，但左丁山對讀者L所言「教員薪金靠UGC經費＋自資課程經費支付」，唔多明白，有啲學系未必有自資課程，但教員一樣有薪水嘅啫？
睇完讀者來郵，到陸羽飲茶，公子L之公子自紐約回港放假，特登到陸羽見吓班世叔伯，問公子L二世喺邊度讀書，佢話：「哥倫比亞大學工程學院，有意主修電腦。」香港學生已經比較少讀工程，但在美國仍然有好多華裔學生攻讀，公子L話：「在哥倫比亞讀邊科都唔相干，反正畢業後都係搭地鐵落華爾街！」哥倫比亞大學位於曼赫頓Uptown，華爾街在Downtown，由哥大去華爾街返工，坐地鐵話都冇咁易，公子L個大仔就係在哥大讀工程，然後入咗大銀行㗎啦。佢兩位公子中三後就去咗美國讀中學，然後入哥大，但普通話講得好好，點解呢？佢嘅細仔話：「哥大嘅中國大陸同學多到不得了，碰口碰面都係，反而香港同學幾少吓，我地大家講普通話，唔講英文，唔講廣東話嘅。」