仲有兩星期就到龍年，雖則大家預告今年經濟環境唔多好，但新年點都要好好睇睇，好似港交所（388）咁，一年一度嘅新春開市儀式今年會有新猷，利是會大封啲，而且仲有機會得到「特別獎」，實行皆大歡喜！
只限出市代表
呢幾年港交所新春開市，一律封封20蚊，雖然對比好市嗰陣，經紀至少派100蚊一封，好似一般咗啲。不過今年就唔同，聽講港交所今年利是會加碼到50蚊一封，加幅有成倍半，另外仲有機會抽到1000蚊一封嘅特大利是！
「特別獎」當然唔係人人有份，初步大約每20封會有一封，睇吓你手氣夠唔夠。咁記者有冇得抽先？消息人士話，大獎只係畀出市代表，採訪嘅記者就冇份喇。華華就覺得難得加碼到50蚊，都算唔錯啦，意頭啫！
新春開市儀式仍然由主席夏佳理同行政總裁李小加主持，以每人派兩封計，即係出市代表有機會一人獨得2000蚊過肥年。
港交所初步預計會派超過200封利是，唔知呢招會唔會吸引多啲人出席年初四嘅新春開市，令交易大堂熱鬧啲呢？
李華華
mailto:[email protected]