雲想衣裳：聯合國潮牌　有喜千嬅冧

中環多筍嘢，只要你肯行，總會發現與眾不同的服飾。開業不夠一個月的1stROW近期矚目，千嬅、阿嬌、Kary輪住借貨出騷。唔賣大牌，專攻獨立潛力品牌，英德比利時韓國都有。怕太誇？店內勝在又有入門級潮衫，合作單位包括星級StylistRickySham，好彩的話，更會教客人點襯。

記者：雷福財
攝影：譚盈傑
模特兒：Margiela@StarzPeople
化妝：呂旻熹
髮型：[email protected]

明星着住出騷

■StephenJones線狀頭飾$3,562、KirstyWard白色頸鏈$4,395、KirstyWard啡色幾何連身裙$6,587、KirstyWard黑色One-piece$1,372、Finsk橙色幾何高跟鞋$4,245

香港地，要做時裝生意難字當頭，賺少當贏。SellUnique的人無我有心態早成小店經營的金科玉律。位於中環威靈頓街的1stROW唔止以此為道，店舖背後更有一班星級Stylist相助，Partner之中更有RickySham，專為千嬅、何韻詩、阿嬌、祖兒、Kary、泳兒、關心妍做形象顧問，但凡頒獎典禮、Event都經佢手先見人，部份出Show衫更是店中貨。身兼店長Buyer於一身的Jasmine，現年27歲，上一份工靠做Buyer儲落的人際網絡，總算找到開店方向。

■千嬅撐Aqua

■關心妍撐KirstyWard

■泳兒撐PushButton

■Kary撐KirstyWard及HouseofHolland

■阿嬌撐Finsk

專攻獨市品牌

愛時裝，變做時裝老闆例子千萬，Jasmine一樣，由做工程到入行做Buyer都經設計師朋友介紹。為圓一個時裝夢，隻身飛到巴黎FashionShow及韓國睇辦，店內所有品牌幾乎都非大家耳熟能詳，但卻靠口耳相傳，未到一個月已受到不少明星愛戴。Jasmine：「初期籌備開店，的確倉卒，為趕及12月聖誕節前開業，1stROW都幾乎零裝修，連個鞋架都係上手留下的木板，我循環再用。幸好，我哋只賣一些香港無引入的Brand，如德國TataChristiane、英國KirstyWard、JoanneHynes、BelleSauvage及韓國OccultRadiance等，聯合國式約20多個品牌，一件貨只會一件起、三件止，唔怕撞款。」

■為趕開業，連上手租客所剩下的黑紅木板也拿來做鞋架，慳家之餘又夠DesignFeel。

■店長Jasmine

■RickySham，千嬅、何韻詩出騷都搵佢執Look。

暫開3個月　欲攻中國市場

Jasmine明瞭香港女人着衫普遍唔夠信心，最好有樣跟，呢點同韓國、日本大不同，自我風格較弱，故除賣出Show服飾外，更有出街版服飾。「明星當然越特別越好，但唔係人人受得落，所以都會入定些Basic款。而另外一半客人好清楚自己需要，上到嚟幾乎唔使點Sell。有時，Ricky都會駐場幫客人教吓襯衫。遇着部份Artist落舖睇衫，會關店畀佢哋揀。現時試做3個月Pop-up形式，睇吓反應。終極目標都係中國市場，但先決條件都是在香港打響名堂再算。」