北京十年，羅孚交咗好多朋友，喺好多人對佢敬而遠之嘅時候，仲有唔少人樂意同佢打交道，呢班真正患難之交，特別拍咗條短片為羅老總賀壽，呢份賀禮，隨時空前，仲好可能係絕後，真係經典。
上鏡嘅包括著名漫畫家丁聰妻子沈峻、著名出版人沈昌文，佢曾任知名雜誌《讀書》主編，被戲稱「不良老年」，可想而知羅孚同佢交朋友，應該好多樂趣。事實上沈昌文對羅孚推崇備至，形容佢係一個「兩岸三地文化界的人際地圖」。
輪住出鏡為羅老總祝壽嘅仲有著名戲劇家吳祖光、「評劇皇后」新鳳霞女兒吳霜，呢啲內地知名文化人同埋文人之後，都同羅孚有非一般交情，睇完短片，八方先至真正體會到羅老總交遊廣闊嘅親和力，識到咁多老友，北京那十年，收穫豐富也。