謝天華惡形chok相，游走警察和罪犯之間，入型入格。Laughing一角似是命中註定，謝天華由配角變做主角，由電視跳返電影，09年開始，他一直laughing到現在。差不多一年一部Laughing，剛上映的電影《LaughingGor之潛罪犯》可能是最後一部，結局是無綫的慣性拍攝手法死不斷尾，天華說：「我都唔知我有冇死！」至於有沒有下集，要睇一班Laughing信眾喇！ 撰文：楊潔雯
無可否認Laughing帶給謝天華很多很多，觀眾第一次聚焦在他身上，得到公司的認同，還有更多的演出機會。記得《學警狙擊》令謝天華爆紅，天華Laughing人神合一，他chok足兩個月，尤記得當年盛世，天華仍笑咪咪說：「乜嘢叫做輕飄飄嘅感覺，我完全體會到，你喺街度行步路都係輕，我真係唔係誇張，唔係作大，我親身體驗到。」
一朝得志曾輕飄飄
天華續說：「因為你喺街度每個人都同你打招呼，一落街一出門口就Laughing哥、Laughing哥未停過，係輕㗎！個人唔知點解輕身咗！好似跣住行咁，真係人哋講我都唔信，家我信，不過呢個感覺維持咗兩個月之後，我定一定神，同自己講呢個感覺係時候要收番嚟，開始隻腳要掂番個地。」
Laughing橫行，天華如魚得水，平時一邊說話一邊腳「奀奀」，加上天生寸嘴，被指態度囂張跋扈，尤如Laughing上身，天華說：「其實我當時都有同自己講要踩番實個地下，我知道每一個小動作，每一句說話，都會俾人放大好多，所以同自己講一定要更加謙虛去處理。」
累積粉絲得來不易
天華說：「我記得有一次接受家燕姐訪問，收咪之後，佢話天華乜你家謙虛咗咁多，我話家燕姐家係需要咁做，稍為打招呼打遲少少，啲人都覺得你囂張㗎！紅咗唔識人，真係㗎！我試過喇！你真係應遲半步，或者真係掛住同人傾偈，人哋都可以話你一朝得志，語無倫次。所以係我要有呢個心理調整，我知道呢個方向係正確。」
由《古惑仔》的大天二，到今日Laughing梁笑棠，天華認為自己的觀眾是一部一部儲起，他的成功，是積累而成，他說：「我的成功得來不易，我唔係一部戲、一個角色咁樣爆紅，係我隻腳踏番地之後要更謙虛，等人覺得我紅咗都好有禮貌，覺得同我合作好舒服。」
或者15年後，謝天華不再年少無知，更明白前車可鑑的道理，他說：「之前有好多前輩，有類似咁多情況，一朝得志，隻眼生喺天，有啲人又會有好多怨氣，當佢有一個機會紅起嚟，就要身邊人受番晒，所以我唔想自己有呢種諗法，一下子搞到所有嘢冇晒，所以我要珍惜。」
Laughing得到一班信眾支持，四年來Laughing有四部作品，是一條公式，又或者是一個習慣，只要喜歡，無綫一定餵飽你。問到上映中的電影《LaughingGor之潛罪犯》會不會是最後一部？天華笑說：「喺呢一套電影裏面，我都唔知我有冇死到，真係㗎喎！一來唔係我話事，老細係觀眾，第二個大老細係公司，睇佢哋個方針點睇，覺得仲有冇創作空間喺個角色度，我就係好被動。」
見好就收怕衰收尾
自己一手一腳打造的傳奇角色，每個演員都希望成為經典，謝天華不希望Laughing變成crying，所以Laughing應否延續，他不置可否說：「我就一半一半，某程度上我都想有新嘗試，唔想睇到冇人睇為止。我唔想個角色由自己一手一腳，將個角色拍到爛，呢個係我唔想見到嘅情況。」
謝天華應該為Laughing畫上一個完美的句號。點到即止，總好過爛尾收場，無綫叫謝天華再拍第5、第6部Laughing，他不會sayno，天華認真地說：「其實我對自己演繹一個全新嘅角色好有信心，當然Laughing成功我好開心，但係如果我只滿足現狀嘅，就係冇進步，我都想嘗試，尋求新嘅突破。」
輸視帝得多過失
謝天華因為Laughing一角名利雙收，卻未能因為Laughing奪得《萬千星輝頒獎典禮2011》最佳男主角，這可能是一個遺憾，不過，從不服輸的天華，卻不認為自己輸了，更以Laughing的口吻用數字證明自己不是一個失敗者。
天華：「好老實講，我喺公司失落呢個獎項，其實我又唔係完全失落晒，我係中國內地有幾個大網站，拎咗個港台地區性最佳男主角，咁反映咗好多內地觀眾認同咗我呢個身分，相比之下，內地有成億億聲嘅觀眾去睇，香港地區可能係二、三百萬，咁究竟我係失定係得？」
積極面對勇往直前
頒獎禮前席勝券在握，結果空手而回，慘遭重擊的天華不許自己意志消沉，成功化悲憤為力量，他說：「每年都有頒獎禮，攞唔到一次唔係世界末日，死人冧樓，我仲要更加積極面對，唔可以逃避。」
天華續說：「我係可以好消極，每日唔開心，爆晒鬚根唔剃鬚話畀人知你有幾唔開心，我係可以咁樣，不過今次我冇，我第二朝0630開工，我要話畀人聽我唔會受到少少打擊成個人散晒，我揀得好正確呢個態度。」
賺人仔放眼世界
經歷過失落視帝寶座一役，謝天華變得更實際，他拒絕做一個沼澤裏的小青蛙。
天華說：「我點解要咁鑽牛角尖，不如將精力精神放喺一個更有空間嘅地方，將眼光放遠啲，唔好做一灘水嘅青蛙仔，呢個地方以外有好多好戲之人。」
天華言之有物，莫非他要學Laughing變節，他笑說：「唔係，我農曆年後會喺內地開部古裝劇，第一次喺內地拍劇，算係我內地嘅新開始，睇多啲嘢囉！」
