市政局一班末代議員喺回歸前埋咗個時間囊落地底，一眨眼差唔多15年，但民政事務局局長曾德成一直懶懶閒，唔多想理呢個前朝遺物。最近政府終於拍板，定喺今年3月28日掘出呢個時間囊。之不過曾局長唔知係咪冇睇《通勝》，當日「忌破土、開生墳」，認真大吉利是。
呢個時間囊收藏咗好多物品，除咗華叔當年放入去嘅國殤之柱相片，仲有一篇回歸寶鼎折足嘅新聞報道。呢篇報道係民主黨黎學廉放入去，當年佢根據《易經》解籤，寶鼎折足係極差嘅卦象，寓意回歸後香港小人當道、民不聊生，結果回歸以來香港經歷沙士、金融風暴，嚟緊仲要豬或狼治港，你都咪話唔驚。