憑一首《（你沒有）好結果》彈出的填詞潮人黃偉文（Wyman），好詞一首接一首，在香港填詞界縱橫18年，Wyman得到的絕對是好結果，不少歌手都憑他的詞取得具代表性的歌曲。累積作品超過1,200首，Wyman威盡不少音樂頒獎禮，去年《那誰》更令蘇永康一曲翻身，在近日各音樂頒獎禮鬧得熱烘烘之際，Wyman就為自己搞個頒獎禮，看看那誰會成為Wyman盤點中的珍品。
撰文：陳玉琼
最忠心男客戶 陳奕迅
Wyman點評：喺我1,200首作品中，Eason唱咗80首，係我最大客仔。Eason出道時第一首主打歌《時代曲》係我寫畀佢，其實Eason參加華星新秀時我已經覺得呢條友好掂，爭取想幫佢寫第一首歌，估唔到佢真係搵我，而我同Eason成為好朋友，係因為阿徐（徐濠縈），嗰時阿徐忙過Eason好多，Eason冇嘢做成日嚟探阿徐班，嗰時佢已經好有吹神本色。
最忠心女客戶 何韻詩
Wyman點評：阿菇（何韻詩）係女歌手之中最大用家，用咗70幾首。阿菇第一張唱片係我寫畀佢，我本來完全唔識呢個人，但之後聽到一個好感人嘅故事，因為嗰時阿梅（梅艷芳）好忙，監製阿智（草蜢蔡一智）會搵阿菇幫阿梅唱晒成張唱片，再畀阿梅喺拍戲等位時去聽，阿梅聽熟之後再去錄音就會錄得好快，阿菇完全唔計較，我好欣賞佢心地好好，我好鍾意獎勵心地好同品性純良嘅人，所以我好用心幫阿菇寫第一張唱片。
革命成功獎 容祖兒《牆紙》
Wyman點評：祖兒張新碟本來做好晒，仲欠《牆紙》未填詞，但英皇唔睇好呢首歌，決定唔會用呢首做主打歌，仲話可以唔使急住填。我唔忿氣，點都要寫到變成主打歌為止，所以我好用心去寫，祖兒亦好用心機去唱，我哋仲同一班音樂後期製作人夾手夾腳努力做到最好。結果，《牆紙》真係變番主打歌，仲喺頒獎禮攞到好成績，唔主打變成主打，我哋成功咗！
有情有義大獎 鄭秀文
Wyman點評：好耐以前，我曾經幫過鄭秀文做特輯同唱片廣告，但係平時亦好少見我哋一齊玩，當我邀請佢做我今次演唱會嘉賓，Sammi竟然諗都冇諗，一口答應。其實十幾年前，我幫佢嘅嘢，從來冇諗過佢會記得，但原來佢真係記得囉！
重組大獎 Shine、Swing、Cookies
Wyman點評：Shine已經有7、8年冇出嚟演出，天佑本來唔想再唱歌，佢家專心寫書，今次係破例重組；解散咗嘅Swing（圖），竟然主動打嚟問，講明第二個絕對唔會再做，但為咗我重組一晚，驚喜到不得了；其實仲有一隊如果重組到都好爆，就係Cookies，坦白講，到家我都冇搵佢哋，係唔敢試，希望Cookies見到呢段訪問，又願意復合的話，畀個電話我喇！
最為朋友大獎 黃偉文
Wyman點評：哈！都要頒番個獎畀自己，喺2月9至13日喺紅館嘅5場「ConcertYY黃偉文作品展」，總共有30個單位演唱，我會幫每位嘉賓做埋形象指導，包辦所有表演嘉賓全身衫褲鞋襪、化妝、髮型，呢幾個月我已經打晒畀全港所有牌子，連法國嘅細品牌、內地同香港嘅設計師全部唔放過，仲要每位嘉賓揀3套衫，再畀佢哋揀一套，希望每位嘉賓出場時觀眾都嘩嘩聲。
友誼萬歲大獎 蘇永康《那誰》
Wyman點評：之前睇住阿公（蘇永康）經歷人生最低潮，當時佢唔係見過好多人，但我同佢都有見面同食飯。佢一路等機會再翻身，等咗幾年，我好希望幫阿公寫一首歌，希望阿公下一首hit歌，我有份參與，好想寫一首歌紀念我同阿公咁多年嘅友誼，感覺係好想同呢個好朋友生個「仔」，《那誰》就係我同阿公一齊生嘅仔，共同擁有咗一首紀念友誼嘅hit歌，見到佢再企番上台攞獎，我感動到喊。
預言成真大獎 彭羚《小玩意》
Wyman點評：彭羚同我講過，佢最大願望唔係做超級巨星，唔係做天后，而係嫁個好老公，做個好媽媽相夫教子，《小玩意》係我送畀彭羚嘅祝福，希望佢嫁個好老公，我寫嗰時佢仲未知道會結婚，點知當日嘅祝福真係靈驗咗。
工業安全大獎 陳慧琳
Wyman點評：好恭喜Kelly又做媽咪，佢話會嚟我演唱會做嘉賓，我好歡迎Kelly隨時改變主意－唔嚟！最緊要佢兩母子平安，本來邀請佢嗰時仲未知佢有BB，幫佢搵咗意大利名師GiuseppeZanotti設計咗對6吋高踭鞋，但家即刻改款變成平底鞋，仲安排定兩位猛男扶佢出場，我只係做定準備工夫，絕對尊重Kelly決定。
非人類貢獻大獎 微博
Wyman點評：有啲唱過我作品嘅歌手，已經改晒電話，聯絡唔到，好似傅佩嘉就係另一個幸福家庭主婦，千辛萬苦至喺微博搵到佢，再用私信邀請佢出席，盧巧音（圖）我亦係喺微博搵番佢。
