今年92歲嘅報壇老前輩羅孚，噚晚出席舊部同朋友為佢搞嘅壽宴，全場22席爆滿，羅老總江湖地位名不虛傳。羅老總係《大公報》前副總編輯、前《新晚報》總編輯，八方噚日見到佢坐輪椅、手拄枴杖到場，帶埋帽同頸巾禦寒，全晚說話唔多，不過樣子好歡喜。
舊友拎《新晚報》索簽名
呢場壽宴可以話係本地文化界近年難得一見盛事，星光熠熠、溫情十足，出席嘅唔少係《新晚報》、《大公報》嘅老員工，仲有好多傳媒、文化人，包括劉銳紹、程翔、陶傑、梁天偉、杜耀明、盧偉力、葉健民等。當然羅老總嘅屋企人包括佢太太、兒子羅海雷同孫兒都有出席。羅老總嘅舊朋友仲攞埋份變黃咗嘅《新晚報》，請羅老總簽名。
噚晚現身嘅大部份係羅老總舊部，至於當年深得佢器重嘅曾德成冇現身，而現時《大公報》高層葉中敏都有到場。
有份搞呢場壽宴嘅前《新晚報》港聞版記者孔慶堂，係羅老總喺《新晚報》嘅舊部，佢話呢位老總唔擺款，平易近人，80年代初同佢哋一班前線記者打成一片。以往左報只請根正苗紅嘅人，羅老總卻冇門戶之見，態度開放，令呢份左報好好睇。
同樣欣賞《新晚報》仲包括才子陶傑。陶傑老父曹驥雲曾喺《大公報》工作，所以佢4、5歲已經識羅老總，「我細細個已經去佢屋企玩」。佢話羅老總辦嘅《新晚報》非常精采，有市場觸覺，「佢呢張左報做到好有知識性同開明，有趣味性，有漫畫、講文藝、講攝影、人物歷史，羅生嘅文章談文論藝，見到佢嘅知識好淵博」。
羅孚喺1982年被屈成為美國「間諜」後，在北京遭軟禁11年，樹仁大學新聞系主任梁天偉話羅孚唔可能係間諜，質疑佢係中共權鬥犧牲品。「佢最叻就係統戰，點會係間諜」。
mailto:[email protected]
