做人冇包袱，講說話先夠坦白。將卸任婦女事務委員會主席嘅高靜芝，曾為CY站台造勢，八方日前同佢傾偈，佢梗係讚到CY天上有地下無啦，話CY曾主動出席一個蚊型研討會，仲參與討論，留到散場先走，令到班女士好感動。高靜芝仲記得，有年三八婦女節，CY上午喺北京出席兩會，下午專程飛返香港出席婦委會午餐例會，覺得佢對女性好尊重。
讚完狼當然要彈豬，高靜芝話每逢婦委會有大型function，都會請高官出席，「邊啲人嚟，邊啲人比較重視婦女工作，我心裏有數」。婦委會每次都發帖畀唐唐，但幾乎次次食白果，只係近兩次肯出席自助人生自學計劃畢業禮做主禮嘉賓，留一陣就走。高靜芝唔係選委，難怪被唐唐冷待，未來幾年，八方希望佢在建制外暢所欲言。