中國網絡攔截技術之精密「舉世知名」，但一味禁止人哋透過互聯網，發表聽唔入耳嘅意見，倒不如化被動為主動，自己發聲好過。所以國務院新聞辦公室領導嘅中國互聯網新聞中心（中國網），早前就宣佈同中播控股（471）結成戰略夥伴，噚日中國網同中播就一齊出嚟講解吓合作詳情。
「要盡輿論引導責任」
合作包括建立「今日中國」網絡，同「今日中國視頻」嘅跨媒體平台，其中「今日中國視頻」嘅內容，更會喺中播嘅紐約數碼電視平台其中一個頻道，作24小時免費播放，播乜呢？當然唔會係《天與地》啦，據中國網多媒體部主任閆昕霞話，中國網係中國四大官方網站之一，主要係為國家做對外宣傳工作，佢仲講到明，喺美國電視台廣播，係希望為中國發聲，盡吓輿論引導嘅責任喎！即係乜嘢？咪將CCTV打入美國囉！