陳潔儀下月將與趙增熹合作舉行音樂會，他們事先聲明今次的音樂會沒有華麗的舞台及服飾，寧可將錢花在音響及樂手身上，希望入場的觀眾享受高水準的音樂，聽到毛管戙。
陳潔儀（Kit）與趙增熹97年在音樂劇《雪狼湖》合作過，對上一次Kit推出的唱片，趙增熹亦是其中一個監製。阿熹一直希望舉行一個感動人心的音樂會，當他想到可觸動人的聲音，便想起Kit，二人下月11及12日在會展舉行兩場「陳潔儀×趙增熹傾城音樂會」。
阿熹透露今次與Kit合作投資舉辦音樂會，從沒擔心賺蝕，反而希望觀眾可以欣賞一個難忘的音樂會：「歌手如果把聲OK，係可以開10幾20場，但係唔係每場都觸動到大家，我好想觀眾會睇到毛管戙，我深信Kit一定做到。而且有好多嘢唔係用錢就可以買到，我希望所有參與嘅人都享受成個過程。」
靚聲最緊要
阿熹表示擔任監製多年，他覺得Kit的聲音十分獨特，加上為她監製唱片後更加欣賞這位歌手：「家好多歌手入錄音室根本冇準備，唔怪得晒佢哋，又要唱歌又要拍戲，又要拍廣告。但係我幫阿Kit監製，佢一首歌唱三次就OK。」
現時沒有與任何一間唱片公司簽約的Kit，十分享受目前的工作模式：「家唔想限時限刻咁去做一樣嘢，好似之前出嗰隻碟，都冇諗過賺到錢，點知最後賣得唔錯。原來自主去做一件事真係好free，又可以搵好多唔同嘅人合作，阿熹就係我其中一個好欣賞嘅監製。」
採訪：李珮洳 攝影：陳順禎
服裝：Escada、Fendi
場地：KappuJamming