「上陣不離父女兵」，長實（001）執董趙國雄噚日帶埋愛女趙宇（Justina），出席置富產業信託（778）投資飯局，為近排單「筍刁」解畫，解釋點解「阿媽」要幫個「女」。
話說置富REIT使咗19億銀，向「阿媽」長和系買咗荃灣麗城花園同北角和富中心兩個商場，預期租金回報率分別有5.2厘同4.8厘。兩個場拉勻嚟計，圍起4000蚊呎。頭戴兩頂帽、身兼置富REIT主席嘅「趙樓神」連聲話抵：「買地都唔止呢個價錢啦！」咁又係，講到尾，阿媽又係你，阿女又係你，梗係抵㗎！
阿女傾刁不成 阿媽再幫
樓神除咗賣樓有一手，教女可謂「恩威並施」。當席上公關請樓神介紹單刁時，佢毫不客氣將個波拋畀個女，仲好嚴肅咁話：「你收錢打工，呢啲嘢由你講！」身為置富副CEO嘅Justina亦不怯場，全情投入解釋。
有記者行家問樓神，點解唔賣多兩個「筍盤」益吓個女時，佢就搞笑咁話：「舊年見佢（趙宇）傾幾單刁都傾唔成，惟有幫吓手啦，費事俾股東話做唔到嘢；公司（長和系）仲有啲好嘢，不過等下次唔掂先再幫啦！」親情果然無價！
李華華
mailto:[email protected]