相隔三年，謝安琪（Kay）將於下周再次在紅館開騷，主題是幸福。入行以來，她備受各種負面聲音包圍，所以老公張繼聰及囝囝的位置很重要，她多得老公沿途陪伴。兩年多的版稅風波，Kay長大了，學懂面對及沉澱自己，再向樂壇從新出發。
謝安琪將在本月13、14日在紅館舉行第二次演唱會，用幸福來做主題，原因是她近年工作認識了很多不同階層的人，一向支持環保的她會用環保物料來做舞台服裝，還邀請了世界知名演奏家和舞蹈家來表演。
自爆食抗抑鬱藥
Kay入行以來，負面新聞不絕，紅館個唱未賣飛，已傳門票滯銷，但她卻從不擔心，她日前接受本報記者專訪說：「我只會專心做好個騷，我哋唔係做好舖天蓋地嘅宣傳，但唔係傳言所講票房唔好。」自從五大唱片跟無綫鬧出版稅風波，令Kay的人氣下滑，但她卻沒有感到不值，她說：「三年前爆紅，當時嘅人氣，連帶未必係我歌迷嘅人都會嚟睇我嘅騷，嗰時好新嘅我好驚喜，但做歌手好多事係身不由己，唔係能力範圍之內嘅事。」
兩年時間過得很快，Kay坦言心態上也改變了，她說：「我出道時間好短就有好多曝光，同我性格唔算好脗合，我算係個好低調嘅人，但當你企咗喺好當眼位，自然會成為娛樂新聞目標，當年嘅我真係唔識點處理，好似跌入萬劫不復咁，頭三個月蜜月期後，就成為新聞目標好辛苦，所以呢兩年我選擇低調啲實幹啲，去做好工作，我唔係成日要見到好多嘢喺街，先維持自信心嘅人。」
Kay續說：「嗰時啲新聞我都招架唔嚟，好似我個人由頭到尾都係錯咁，好辛苦，呢種成日俾人無理批評嘅時期，其實好傷害我自己，嗰時我真係要食抑鬱藥，但過咗你問番我，真係好多嘢唔記得晒，呢兩年畀到我沉澱，慢慢觀察自己係點嘅歌手。」
最愛張繼聰幽默
Kay承認老公張繼聰及囝囝張瞻在這段時間佔很重要的位置，她說：「外面受咗乜嘢，一返到屋企就得㗎喇，其實我個仔先係我導師，教我快樂其實好簡單，老公亦係個好幽默嘅人，24小時都好搞笑，呢個都係我答應嫁畀佢嘅原因，有乜好得過日日笑，佢個人好樂觀又睇好多書，好多事都好有見地，所以我同個仔都好崇拜佢。」
採訪：溫敏芝 攝影：陳慧安
場地提供：天后瀰月屋