香港有好多中產係民主派，每逢選舉就投票俾泛民候選人；中產人士之中，有好多係蘋果讀者，佢地睇到蘋果日報報導民主派政治人物之經濟政策，幾驚㗎。一位讀者Ninja來電郵節錄如下：
「客套話不說了，看今天（十二月三十一日）你的文章觀點，我絕對同意。一些所謂民主領導人物之作為，真係不敢恭維，但又不忍心批評，何解？恐傷及民主招牌。對於所謂民主，真係令人迷茫，我剛從歐洲回港，體會甚深，一字曰：惊。觀乎本地民主派提倡那些什麼撈什子，全民退休保障、最低工資，喂！搞邊科呀大佬，仲使講，直情係搞社會主義啦。」
Ninja之言，相信不少中產有同感，大家支持一人一票雙普選，願投民主派一票，但佢地之經濟政策照抄西歐社會主義政黨，睇吓今日之歐債危機，何俊仁何以善其後？羅致光在電台話，邊位特首參選人唔講全民退休保障，泛民選委寧願投白票，咁講法，唐英年與梁振英都唔駛再同泛民傾談咯。
另一位讀者方先生來郵講廣東話文章，佢引用不少詩詞佳句證明廣東話入詩，早已有之，例如：
劉禹錫「烏衣巷」：「舊時」王謝堂前燕，「飛入」尋常百姓家；
李煜「虞美人」：問君能有「幾多」愁；
蘇軾「江城子」：千里孤墳，無處「話」淒凉
王維「終南別業」：「行到」水窮處；
杜甫「不離西閣二首」：不知西閣意，肯別「定」留人；
劉禹錫「枝竹詞」：東邊「日頭」西邊雨；
李清照「一剪梅」：此情「無計」可消除，才下眉頭，卻上心頭
李白「將進酒」：莫待金「樽」空對月；
以上詩詞出現之廣東話，舊時、飛入、幾多、話、定、行到、日頭、無計、樽……等等，唐宋時代常用，今天只有廣東話才留有古風，普通話（白話文）不用。舊時左丁山讀羅香林教授文章，佢考證話廣東話係唐代人士常用語言！左丁山留意到韓劇之中，一啲韓語發音與廣東話發音相近，例如「太極」、「南大門」，諗吓唐代有不少日韓學生留學長安，唐代與高麗打仗不少次，薛仁貴征東便是家傳戶曉故事，韓國人至今保持不少唐朝風俗，其語言帶廣東音，我地用廣東話寫文章，唔駛慚愧啩？