一間公司走去上市，英文叫做「gopublic」，即係話畀大家知，上市公司涉及公眾利益，唔可以畀大股東同管理層亂咁嚟。所以董事會有「獨立非執行董事」呢個職銜，就係想委任獨立嘅人入去監察公司。但獨立非執董有幾「獨立」？或者營運九巴嘅載通（062）可以畀啲啟示大家。
陳祖澤做董事長11年
話說載通噚日發咗份通告，宣佈將非執董嘅陳祖澤調去做獨立非執董。陳祖澤？係，你冇睇錯，就係曾經喺載通做咗11年董事長、年年九巴加價出嚟講嘢嘅陳祖澤！載通解釋，陳祖澤08年4月已離開公司，雖然事隔唔夠4年，但覺得佢已符合上市規則「獨立性」嘅標準，所以做獨立非執董完全冇問題。之但係，陳生喺載通做咗咁耐，同公司管理層friend過打band，咁都叫「獨立」？華華真係大開眼界！