今季賽程又短又密，未必個個球員身體都應付得到；好似馬刺主力真路比利，早前左手尾指骨折，預計開刀要唞成2個月；而灰熊「肥仔嘜」蘭度夫亦因膝傷要缺陣6至8星期。就算勁到好似熱火「三頭犬」都頂唔順。周三佢哋主場炒溜馬118:83，獲迪就已經因傷避戰，而勒邦占士（圖）打到第3節仲幾乎拗柴，好彩檢查後冇事。