馬刺星期一作客木狼，爆大冷以96:106輸波。輸波事小，最大件事係主力得分後衞真路比利（右）左手尾指骨折。第2節尾，木狼中鋒杜利華鏟籃嗰時，真路比利喺途中出手偷波，可惜波偷唔成，仲整親手指。佢受傷之後，即刻捉住自己隻手，表情十分痛苦，仲痛到踎低！佢星期二會接受詳細檢查，家連幾時復出都唔知，馬刺呢鋪有排煩。