樂隊Mr.今年喺樂壇成績唔錯，啱啱過去嘅新城同商台頒獎禮都有獎攞，對出道踏入第四年嘅Mr.自然係一種鼓勵，佢哋自然密密炮製好歌報答歌迷。日前Mr.特別拍攝新歌《人一世物一世》MV，導演特別構思搖滾到80歲嘅主題，Mr.用三個鐘化老人妝做老伯伯，喺拍攝現場仲好興奮咁爭坐輪椅、拎拐杖同扮駝背，成員Alan又貪玩拎拐杖當劍咁舞、扮high爆跳高，點知蝦碌仆落地，笑爆全場。
Tom最神似
五人之中，Tom因身形瘦削，扮老伯伯最神似，導演即刻加重佢戲份，安排佢坐輪椅出場。MV劇情講述Tom因懷緬過去，call齊老友記嚟夾Band，場景十足十《天與地》結局。到咗最後，Tom因為要換尿袋被迫離開鼓手位置，為咗拍攝呢煽情一幕，Tom事前認真同導演研究老人家嘅動態同表情，專業程度令導演好感動，但就難為咗一班同Tom做對手戲嘅隊員，因為個個都忍唔住笑，NG好幾次先完成。