早陣子度過了歷史性最冷平安夜，氣氛夠就夠，但對於一向唔多抵得冷的港人，大褸頸巾手套冷帽盡出，寧願着到隻糉型少陣。要禦寒，其實不止羽絨才能勝任，皮褸一樣夠保暖，仲可以Rock到盡，最吸引還是一件皮褸穿十年八載亦為等閒，除開幾千銀或過萬，其實化算到極。
記者：雷福財
攝影：陳盛臣
拼貼變突出
皮褸好悶？非也。只要見過今季不少品牌都拿着Patchwork式做褸方程式，你會發現其實可有千萬種變化。除了基本的窩釘、金屬鈕外，以其他物料與各式牛皮融合更是眼前一亮，如PierreBalmain的牛仔布或布拼羊皮，盡用牛迷最愛兩大元素，「加色」效果突破淨色的沉悶。要不是如C'N'C的紅色皮褸再搭灰色牛皮作點綴，一樣富有淡淡的Two-tone效果。
多重色系皮
對於皮褸迷來說，黑色自是首選，但對於非黑白灰的時裝潮人來說，鮮色皮褸更合適。TOUGHJeansmith今季便推出各色羊皮褸，配合其獨特洗水效果，增添一份Vintage味，再襯一件爛牛仔褲，即時有種霆鋒上身的感覺。
衣櫥內必備
男人衣櫥內兩大最重要之物必為Suit及皮褸，遇着隆重場合實無走雞，但想瀟灑一點，點計還是皮褸好。對潮人來說，入手皮褸每每有「選擇困難症」，絕大多數還是價錢問題。高質一點的羊皮Biker皮褸過萬絕對走唔甩，正如即將於3月開專門店的法國品牌PierreBalmain所做的皮褸，的確予人一份信心，收腰的Cutting位、細節做足，其主線Balmain更深受韓火火追捧。所以呢，只要久不久以洗皮水清理及晾晾自然歷久常新，就算只着一季，其實還是值回票價。
a.izzue（29722572）
銅鑼灣希慎道1號G2號舖
b.C'N'C（25060700）
銅鑼灣時代廣場4樓433號舖
c.G-StarRaw（31049099）
銅鑼灣禮頓道77號禮頓中心G13-14號舖
d.bauhaus（28916811）
銅鑼灣耀華街2號地下至3樓
e.PierreBalmain（客戶查詢熱線：21696136）