梁家輝喺港產片《這個阿爸真爆炸》入面，飾演一個得個殼嘅惡爸，不過祖爾巴頓就係一個真真正正嘅惡棍老竇。呢個昆士柏流浪（QPR）中場，前晚喺英超頭撞諾域治中場巴特利莊臣領紅出場，連累球隊反輸1:2，事後仲俾對方寸佢口臭。
做咗老竇仲唔收火
QPR前晚喺主場同諾域治合演升班馬大戰，開賽僅11分鐘就由祖爾巴頓先開紀錄；諗住有個好開始，點知呢個躁底王喺36分鐘因用頭撞對方球員巴特利莊臣，俾球證史禾比克直接用紅牌趕出場。佢哋未到半場就打少一個，梗係乜優勢都冇晒，結果安東尼派京頓喺42分鐘先為諾域治追成1:1；之後史提芬摩利亞喺83分鐘幫諾域治反超前2:1，最終QPR亦由贏變輸。
祖爾巴頓喺上月28號榮升爸爸，我求大俠以為佢會收吓火，點知仲係咁躁，仲要喺新一年嘅第2日就攞咗英超生涯第5張紅牌。事後佢死唔順氣，喺twitter度數臭球證，話自己根本冇侵犯巴特利莊臣，認為判決好荒謬：「我睇咗25次重播，如果我真係有撞佢，一定會即時道歉，但問題係我根本冇做過。」
事後遭對手寸口臭
賽後走咗去水晶宮睇世界飛鏢錦標賽嘅巴特利莊臣，亦即時還拖，仲喺電視鏡頭前高舉一塊寫有「巴頓，你好口臭呀！（Barton,yourbreathstinks）」嘅紙板。好明顯，佢係講緊同祖爾巴頓近距離接觸後，聞到對方個口有好大陣味。話時話，佢用咁嘅方式回應祖爾巴頓，又真係幾鬼馬同幾有創意喎！
中國人成日話心火盛會口臭，祖爾巴頓咁躁，睇嚟巴特利莊臣應該冇屈佢。而祖爾巴頓事後仲口多多喺twitter發表偉論，可能令佢俾英足總紀律處分。
至於賽後撐佢話巴特利莊臣係詐死嘅QPR領隊禾諾克，亦有機會被英足總秋後算賬。我求大俠奉勸祖爾巴頓一句，飲多杯涼茶啦！