皇家馬德里班球員真係犯賤，新年流流係要俾教練摩連奴省鑊甘，先至肯使出真功夫。摩佬獅吼功一出即刻有魔法效果，半場休息嗰陣一次過換3件，結果皇馬禮拜二喺西盃16強首回合，半場落後兩球反勝來訪嘅馬拉加3:2，開唔到[-2]「主勝」都至少幫捧場客保住1.08倍熱W！
半場夢遊落後馬拉加0:2
睇番皇馬個正選陣容，雖然唔係最強陣，但話晒卡斯拿斯、沙比阿朗素、基斯坦奴朗拿度（C朗）、卡卡同希古恩等都喺度，拍落馬拉加仲高好多！唔知係咪放假放到心散，皇馬班球員喺上半場竟夢遊球場，未到半粒鐘就俾對手嘅沙治奧辛捷士同迪米捷利斯攻入而落後0:2。新年首戰就搞成咁，摩佬唔嬲就假，半場休息時喺更衣室勁插班球員。
呢位葡萄牙主帥賽後咁講：「我半場同球員講，如果我可以換晒11個人，一定會咁做！其實我考慮過喺上半場就換人，但我唔鍾意咁做；我要求佢哋咪再好似上半場咁，踢啲垃圾波出嚟。」
摩佬接掌皇馬後，未試過半場休息時一次過換晒3個，但今場波佢就作出零的突破，換走卡卡、艾比路亞同荷西卡利祖，調入基迪拉、奧斯爾同賓施馬，成班波即時生晒，仲喺10分鐘左右連入3粒。基迪拉先喺68分鐘追番一球，希古恩喺兩分鐘後扳成2:2；去到78分鐘，施馬射入致勝球，最終幫皇馬反勝3:2。
卡卡被換走前途似「咁」
摩佬賽後補充：「我哋上半場唔知搞乜，但下半場回復應有水準，球員嘅比賽態度認真咗，而且亦肯集中精比賽。」佢仲用「垃圾」嚟形容球員上半場嘅表現，而卡卡半場被換走，西班牙傳媒亦將矛頭直指該巴西球星。
雖然摩佬冇點名鬧卡卡，但就好寸咁講：「我只係想講，我想喺被換走嘅球員身上，為球隊搵到啲有用嘅嘢，可惜搵唔到！」照咁睇，卡卡喺皇馬應該時日無多，唔知佢下一站係去英超，定係去法甲巴黎聖日耳門跟舊老細安察洛堤搵食呢？